Иако видеото е снимено пред неколку години, неговото повторно објавување предизвика бројни реакции и поттикна шпекулации за односот меѓу пејачот и неговата долгогодишна партнерка Ана Курникова.

Снимката што „крена прашина“

Спорниот момент се случил уште во 2022 година, за време на средба со обожавателите во Лас Вегас. На снимката се гледа како Иглесијас позира со обожавателка која прави селфи, по што таа го бакнува во уста додека тој ја држи околу половината.

Иако видеото уште тогаш го привлече вниманието на јавноста, многумина беа изненадени што пејачот неодамна повторно го објави на својот Инстаграм профил. Снимката набрзо се прошири на социјалните мрежи и повторно стана тема на расправа меѓу неговите следбеници.

Обожавателите загрижени за неговиот однос со Ана

Бројни следбеници изразија зачуденост поради одлуката на Иглесијас повторно да ја сподели снимката, а некои сметаат дека таквото однесување не е соодветно со оглед на неговата долгогодишна врска со Курникова.

„Дали тој сè уште е со Ана? Се обложувам дека таа не е воодушевена од ова“, напиша еден следбеник. Друг порача дека, од почит кон партнерката, можеби би било подобро видеото да не било повторно објавено.

Се појавија и коментари од оние кои сметаат дека постојат граници што ни познатите личности не би требало да ги преминуваат, без оглед на односот со обожавателите. Некои отидоа и чекор понатаму, па почнаа да шпекулираат дека објавата би можела да укажува на проблеми во врската или дури на раскинување на парот.

Иглесијас тврди дека Ана нема ништо против

Сепак, самиот пејач и претходно јасно рекол дека неговата партнерка нема проблем со неговиот близок однос кон обожавателите. Во разговор за „SiriusXM FYI Show“ во 2024 година, тој објаснил дека прегратките и бакнежите се дел од неговата комуникација со публиката.

„Ана е на моите концерти и гледа што правам. Сакам да ги гушкам моите обожаватели, да ги бакнувам и да бидам блиску до нив“, изјавил тогаш.

Потоа додал дека Ана често му велела дека луѓето ја прашуваат дали ѝ пречи таквото однесување, на што таа наводно одговорила дека е целосно опуштена, бидејќи знае дека станува збор за интеракција со публиката за време на настапите. „Сакам да добивам толку многу љубов од моите обожаватели и свесен сум дека без нив немаше да бидам таму каде што сум“, истакнал Иглесијас.

Повеќе од две децении заедно

Иглесијас и Курникова се заедно од 2001 година, кога се запознале на снимањето на спотот за неговиот голем хит „Escape“. Во текот на повеќе од две децении врска, тие главно успеваа да ја зачуваат приватноста, ретко зборувајќи јавно за својот однос.

Парот денес има четири деца: близнаците Луси и Николас, ќерката Мери и синот Ромео, кој се роди кон крајот на минатата година.

Додека Иглесијас и понатаму ужива во светската слава, 44-годишната Курникова се повлече од професионалниот тенис во 2003 година. Во времето на најголемата слава, руската спортска ѕвезда се занимавала и со манекенство, а во 2002 година била прогласена за најсексапилна жена во светот, пред Бритни Спирс и Џенифер Лопез.