[ФОТО] Погледнете како изгледа денес авионот од најбогатиот шеф на наркокартел во историјата

Претприемачот Џони Палмер го претворил поранешниот авион на Пабло Ескобар во луксузен „Airbnb“, каде што ноќевањето чини околу 500 евра по лице. Боингот 727 првично бил изграден во 1968 година и претворен во приватен авион на почетокот на 1980-тите, кога бил во сопственост на колумбискиот бос на кокаин.

Пабло Ескобар се смета за најбогатиот криминалец во историјата, собрал неверојатно богатство вредно околу 30 милијарди долари до моментот на неговата смрт.

Затоа не е изненадувачки што неговиот авион бил украсен со златни детали и кристали. Во меѓувреме, тој е префрлен на друг сопственик и е реставриран, но го задржал својот ретро изглед од 80-тите.

Оваа необична сместувачка единица сместена во трупот на авионот има две дневни соби, спална соба со брачен кревет, три тоалети, туш кабина и целосно опремена кујна дизајнирана да смести максимум четири лица.

Надвор од авионот има палуба со џакузи, сауна и надворешен туш за уживање на отворено во потоплите месеци. Исто така, важно е да се напомене дека целиот објект се напојува со обновлива енергија преку соларни панели.

Трупот на авионот е поставен на контејнери за превоз во индустриската зона Скајлајн Парк во Бристол, Обединето Кралство.

Ако планирате да го изнајмите преку „Airbnb“, добро е да знаете дека овој простор е тивка оаза за време на викендот. Сепак, во текот на неделата, вашиот одмор може да биде расипан од камионите за достава во соседниот двор.