Имено, според една студија, само 8.000 чекори се сѐ што ви е потребно за здравје и потенцијално продолжување на животот, а тоа треба да го правите само еднаш или двапати неделно.

Студијата, која е објавена во списанието „JAMA“, ги анализирала податоците на 3.101 возрасно лице што учествувале во Националните истражувања за здравје и исхрана во 2005/2006 година и една седмица носеле акцелерометар, кој го следел бројот на нивните чекори, а тие податоци потоа биле споредени со податоците за нивната смртност до крајот на 2019 година.

Истражувачите откриле дека луѓето кои правеле 8.000 или повеќе чекори дневно еднаш или двапати неделно имаат кардиоваскуларни придобивки и пониски стапки на смртност, речиси еднакво добри како и луѓето што ја поминувале истата далечина секој ден во текот на седмицата.

Поконкретно, тие откриле дека луѓето кои направиле најмалку 8.000 чекори во текот на еден или два дена имаат 15 проценти помал ризик од смрт во следните 10 години, додека луѓето што правеле 8.000 или повеќе чекори три до седум дена во седмицата имаат 16,5 проценти помал ризик во споредба со луѓето што правеле многу мал број чекори дневно.

Ризикот од смрт од срцеви заболувања бил приближно ист – 8,1 процент кај групата што пешачела еден до два дена и 8,4 проценти кај луѓето што редовно правеле повеќе чекори.

Заклучокот од студијата донесе прилично позитивни вести за луѓето што вежбаат само за време на викендот.

„Наодите од студијата укажуваат дека кај возрасните кои се соочуваат со тешкотии во редовното вежбање, постигнувањето на препорачаниот дневен број чекори само неколку дена во седмицата може да има значителни здравствени придобивки“, наведуваат авторите на студијата.

Придобивки од вежбањето само неколку дена во седмицата

Важно е да се истакне дека студијата има одредени ограничувања. Во неа биле анализирани само податоците за физичката активност во текот на една седмица и не биле земени предвид други облици на вежбање што би можеле да придонесат за здравјето, а не бараат правење чекори, како што се возење велосипед или веслање.

Видот на вежбањето што го практикувале луѓето и интензитетот на нивното вежбање, исто така, не биле земени предвид, бидејќи уредите за следење мереле само чекори. Сепак, експертите велат дека во тоа има нешто.

„Тоа е прилично во согласност со она за што разговарам со многу мои пациенти, бидејќи, во реалноста, повеќето Американци не прават 8.000 чекори ниту еден ден во седмицата“, изјавил кардиологот Шон Хефрон.

Тој додал дека не мора да бидете маратонец или дури тркач на пет километри за да имате кардиоваскуларни придобивки од физичката активност.

Пешачењето и физичката активност воопшто имаат многу придобивки за срцето и за целокупното здравје. Меѓу другото, ги поттикнуваат клетките во телото, срцето и мускулите да произведуваат ензими и соединенија што поддржуваат различни процеси во организмот, ја подобруваат чувствителноста на инсулин, придонесуваат за добар крвен притисок и помагаат во одржувањето на здрава телесна тежина.

„Физичката активност е добра за вашите коски, мозокот, имунолошкиот систем, нивото на стрес и за вашиот сон. Луѓето што се физички активни, исто така, имаат тенденција и подобро да се хранат“, се согласи кардиологот Холи С. Андерсен.

Во целина, важно е да се движите, дури и ако тоа е само неколку пати неделно.

„Знаеме дека долготрајното седење е исклучително штетно за нас. Преминот од седење кон каква било физичка активност носи најголеми придобивки. Со сѐ повеќе вежбање, придобивките почнуваат постепено да се намалуваат. Доволното пешачење секој ден е здраво, но ако тоа го правите само два до три пати неделно, продолжете така“, изјавила Андерсен.

Резултатите од оваа студија нудат потенцијално попристапна почетна точка од препораките на „AHA“ и Министерството за здравство и социјални услуги („HHS“), според кои целта е најмалку 150 минути аеробна активност со умерен интензитет неделно, заедно со два дена активности за зајакнување на мускулите.

„AHA“ исто така препорачува луѓето да поминуваат помалку време седејќи, нагласувајќи дека дури и активности со лесен интензитет можат да ублажат дел од последиците на седечкиот начин на живот.

„Сепак, повеќето луѓе не успеваат да ги исполнат ниту најосновните цели“, рекол Хефрон.

Само 47 проценти од Американците ги исполнуваат препораките за аеробна активност, а 24 проценти ги исполнуваат и препораките за аеробна активност и за тренинг за сила, според податоците на Центарот за контрола и превенција на болести („CDC“).