Антониа Гиговска уште еднаш покажа дека со право важи за една од најстилските млади дами на македонската музичка сцена. Популарната пејачка привлече бројни погледи со своето впечатливо модно издание на дипломската прослава на моделот Елена Ѓорговска, која се одржа во елегантниот амбиент на „Шато Камник“.
За оваа свечена пригода, Антониа избра креација од македонското модно ателје „Sidor“ – фустан кој плени со својата уникатна комбинација на пастелни нијанси и современ дизајн. Разиграниот крој нежно ја следеше нејзината силуета, додека внимателно избраните материјали и ефектната игра на бои внесоа свежина и авангарден моден израз. Креацијата совршено ја истакна нејзината природна елеганција, а воедно беше доказ дека домашниот дизајн сè почесто е прв избор на познатите Македонки.
Изгледот беше надополнет со беспрекорен мејкап, зад кој повторно стоеше нејзиниот долгогодишен соработник Даниел Николовски. Софистицираната шминка, која ги нагласи цртите на лицето без да ја наруши природната убавина на пејачката, совршено се вклопи со впечатливата модна комбинација.
Антониа не остана незабележана ниту кога се качи на сцената. Пред присутните гости таа приреди енергичен музички настап, изведувајќи дел од своите најголеми хитови, со што создаде одлична атмосфера и ги крена гостите на нозе.
Настапот доаѓа во период кога пејачката ужива во успесите на својот втор студиски албум „Жена“, проект со кој отвори ново поглавје во својата музичка кариера. Албумот беше одлично прифатен од публиката, а Антониа продолжува да докажува дека покрај препознатливиот вокал, поседува и автентичен стил кој секогаш привлекува внимание.
Со уште едно впечатливо модно појавување и енергичен настап, Антониа Гиговска потврди дека знае како да остави силен впечаток – и на сцената и надвор од неа.
