Повеќе од половина од жените ја добиваат оваа инфекција: Во лето „демне“ повеќе од кога било

Циститисот е вид уринарна инфекција што го зафаќа мочниот меур, а обично е проследен со печење при мокрење, честа потреба за одење во тоалет, потемна или заматена урина и болка во стомакот. Настанува кога бактериите ќе навлезат во уринарниот тракт и ќе почнат да се размножуваат, а ризикот можат да го зголемат бременоста, менопаузата, недоволниот внес на вода и ослабениот имунитет.

Меѓу 50 и 60 проценти од жените барем еднаш во животот добиваат циститис, додека до 24-годишна возраст околу една третина од жените го искусуваат ова заболување. Во лето проблемот дополнително се засилува бидејќи жештината ја зголемува веројатноста за дехидратација. Бабак Ашрафи, лекар по општа медицина, изјави:

„Кога сме дехидрирани, урината станува поконцентрирана, што може да го иритира мочниот меур и да го зголеми ризикот од развој на инфекции“.

Фармацевтот Ноел Викс наведе дека променливото летно време може да создаде „совршени услови“ за развој на циститис. Тој додаде:

„Во текот на летните месеци температурите значително осцилираат. Овие промени можат да влијаат врз нивото на хидратација, имунитетот и растот на бактериите, а сето тоа игра улога во ризикот од појава на циститис“.

Дополнителен проблем претставуваат засиленото потење, тесната облека и мокрите костими за капење кои не се пресоблекуваат веднаш, бидејќи тоа го поттикнува развојот на бактерии во топла и влажна средина. Ризикот можат да го зголемат и подолгите патувања и одложувањето на мокрењето, како и поголемиот внес на алкохол и кофеин. Околу 60 проценти од повторувачките случаи се поврзуваат со сексуален однос, бидејќи движењата за време на сексуалниот однос можат да ги потиснат бактериите кон мочниот канал и мочниот меур.

За намалување на ризикот се препорачуваат доволен внес на вода, одржување на интимната регија чиста и сува, бришење од напред кон назад, мокрење по сексуален однос и носење памучна долна облека.