Високите температури не влијаат само на чувството на исцрпеност, туку можат да го променат и крвниот притисок, а последиците може да бидат посериозни отколку што мислите.

Грижата за здравјето на срцето и крвните садови најчесто се поврзува со исхраната и физичката активност. И додека научните истражувања потврдуваат дека медитеранската исхрана го намалува ризикот од кардиоваскуларни заболувања, а редовното вежбање го намалува ризикот од предвремена смрт, тоа не се единствените фактори што влијаат врз здравјето на срцето. Подеднакво важни се и квалитетот на сонот, справувањето со стресот, социјалните односи, но и временските услови. Особено во текот на летото, кога високите температури можат да влијаат на крвниот притисок на начин што многумина не го очекуваат.

Како жештината влијае врз крвниот притисок?

Многумина не размислуваат дека времето може да влијае врз работата на срцето, но таа поврзаност е сосема реална. Д-р Ника Голдберг, кардиолог од здравствениот центар „NYU Langone Health“ и основач на Центарот за женско здравје Џоан Х. Тиш, објаснува дека подолг престој на високи температури може да доведе до опасен пад на крвниот притисок.

„Кога телото се прегрева, крвните садови се шират за да ја ослободат вишокот топлина. Тоа може да доведе до пад на крвниот притисок, особено ако поради потење дојде до дехидратација“, изјавила таа за „Parade“.

Иако понискиот крвен притисок често се смета за пожелна состојба, наглиот пад предизвикан од жештината може да биде опасен.

„Колку ќе се намали притисокот зависи од секој човек, телесната тежина, физичката подготвеност и други фактори. Некои луѓе можат да почувствуваат слабост или вртоглавица, особено кога нагло ќе станат или по подолг престој на отворено“, додава д-р Голдберг.

Жештината дополнително го оптоварува срцето

Освен што може да го намали крвниот притисок, високата температура го принудува срцето да работи поинтензивно за да го разлади организмот.

„Поради тоа, пулсот може да биде забрзан дури и при активности што вообичаено не претставуваат напор. Во исто време, губењето течности преку потење го намалува волуменот на крвта, па срцето мора да работи повеќе за да ја испумпува низ организмот“, објаснува кардиологот.

Кај лица кои веќе имаат срцеви заболувања, овие промени можат да предизвикаат:

• непријатност или болка во градите,

• отежнато дишење,

• вртоглавица,

• несвестица.

Научниците предупредуваат на сериозни последици

Истражување објавено во 2024 година во стручното списание „Circulation Research“ покажало јасна поврзаност меѓу високите температури и зголемената смртност од кардиоваскуларни заболувања.

Според резултатите од студијата, смртноста од болести на срцето и крвните садови се зголемува за 2,1 проценти со секој степен на пораст на температурата.

Кој треба да биде особено внимателен?

Д-р Голдберг предупредува дека за време на топлотни бранови особено се загрозени:

• лица со срцеви заболувања,

• луѓе со низок крвен притисок,

• лица со дијабетес,

• луѓе со заболувања на бубрезите,

• лица со прекумерна телесна тежина,

• постари лица.

„Постарите луѓе се изложени на поголем ризик бидејќи нивниот организам повеќе не ја регулира телесната температура толку ефикасно, а често потешко ги препознаваат првите знаци на топлотна исцрпеност“, вели таа.

Таа додава дека одредени лекови, како што се диуретиците и некои лекови за регулирање на крвниот притисок, можат да го зголемат ризикот од дехидратација или да ја отежнат адаптацијата на организмот на високите температури.

Како да го заштитите срцето во текот на летото?

За да го намалите ризикот од проблеми предизвикани од жештината, експертите советуваат:

• планирајте го престојот на отворено во утринските или вечерните часови;

• пијте доволно вода во текот на целиот ден;

• носете лесна и прозрачна облека;

• правете паузи во сенка или климатизиран простор;

• ако имате хронично срцево заболување или друго сериозно заболување, разговарајте со лекар дали е потребно да се прилагоди терапијата за време на големи горештини.

Симптоми кои не треба да ги игнорирате

Д-р Голдберг предупредува дека негативното влијание на жештината врз срцето и крвните садови може да се препознае по следните симптоми:

• вртоглавица,

• слабост,

• изразен замор,

• забрзана или неправилна работа на срцето,

• непријатност во градите,

• отежнато дишење,

• несвестица.

„Овие симптоми не треба да се занемаруваат, особено ако веќе имате срцеви проблеми“, нагласува таа.

Доколку забележите кој било од овие знаци, веднаш прекинете со физичката активност, преместете се во разладена просторија или во сенка и пијте вода доколку сте во можност. Соблечете ја тесната облека и одморете се.

„Ако симптомите брзо не исчезнат или почувствувате силна болка во градите, долготрајно отежнато дишење, збунетост или ја изгубите свеста, веднаш побарајте итна медицинска помош“, советува кардиологот.

Иако хронично покачениот крвен притисок е еден од најголемите фактори на ризик за болести на срцето, подеднакво опасен може да биде и наглиот пад на крвниот притисок предизвикан од високите температури. Затоа, во текот на жешките летни денови е важно да останете добро хидрирани, да избегнувате престој на сонце во најтоплиот дел од денот и внимателно да ги следите сигналите што ви ги испраќа вашето тело.