Заклучокот е донекаде мрачен: ако веќе мора да избереме место за преживување на апокалипса, Австралија во моментов е најдобриот избор – но ниту таму нема гаранција дека човештвото би поминало без сериозни последици.
Доколку светот го погоди катастрофа од планетарни размери, најдобрата адреса за преживување би била – Австралија. Научниците, анализирајќи стотици истражувања за можните глобални катастрофи, заклучиле дека токму оваа островска држава има најголеми шанси да издржи најразлични сценарија на апокалипса. Сепак, предупредуваат дека ниту Австралија не би била целосно безбедна, пренесува „Daily Mail“.
Истражувачите од Универзитетот во Хаген ги проучувале последиците од удари на астероиди, големи вулкански ерупции, нуклеарна војна, пандемии и други закани. Тие заклучиле дека најотпорните држави главно се богати, демократски, оддалечени од големите конфликти и располагаат со развиена индустрија и земјоделство, а дополнителна предност имаат доколку се наоѓаат на остров.
Австралија произведува големи количества храна, располага со рудници, развиена индустрија и производство, има доволно простор за приспособување, а опкружена е и со океан кој ги ублажува температурните екстреми. Нејзината оддалеченост од кризните подрачја исто така би можела да претставува голема предност. Но, токму изолираноста би можела да стане проблем во случај на прекин на глобалните синџири за снабдување и недостиг на гориво.
Научниците ги поделиле глобалните катастрофални ризици во три групи. Првата опфаќа настани кои нагло би го намалиле количеството на сончева светлина, на пример по огромна вулканска ерупција, нуклеарна зима или удар на астероид. Втората опфаќа големи нарушувања на инфраструктурата, како прекин на снабдувањето со електрична енергија, транспортот и производството на храна поради силни геомагнетни бури, нуклеарен електромагнетен импулс или кибернетички напади. Третата група се однесува на биолошки закани кои можат да предизвикаат масовни жртви и да го нарушат животот на цели континенти или на глобално ниво.
Покрај Австралија, меѓу поотпорните држави се Нов Зеланд, Јапонија, Швајцарија и Аргентина. Сепак, секоја од нив има свои слаби точки – од цунами и вулкани до зависност од меѓународната трговија.
