[ФОТО] Дејвид Гета од Скопје си замина со уникатен подарок: Македонскиот дизајнер Грабуловски му наслика јакна со симболи од Македонија и неговата кариера

По неговиот грандиозен настап во арената „Тодор Проески“, каде пред околу 50.000 посетители приреди незаборавна вечер, Гета доби уникатен подарок – рачно насликана јакна, изработена специјално за него од македонскиот дизајнер Сатја Грабулоски и неговото „SWithADot“ студио.

Станува збор за „one-of-a-kind“ парче, создадено со идеја на едно место да се спојат Македонија, музиката и најзначајните моменти од повеќедецениската кариера на еден од највлијателните диџеи и продуценти во светот.

Јакната е осмислена како своевидно уметничко платно, на кое преку внимателно одбрани мотиви се раскажува приказна за Гета – неговите почетоци, големите хитови, достигнувањата, љубовта кон музиката, но и симболи што се директно поврзани со Македонија.

Посебно внимание привлекуваат ракавите, на кои се испишани и насликани различни детали, секој со свое значење.

На левиот ракав се наоѓа монолитот над македонското знаме, заедно со датумот на независноста на Македонија – симболика која директно ја поврзува јакната со големиот јубилеј, 35 години независност на земјата, по повод кој беше организирано и спектакуларното шоу на Гета во Скопје.

Покрај македонските мотиви, на истиот ракав се испреплетени и елементи поврзани со кариерата на францускиот музичар. Тука е и Греми наградата, како симбол на неговите огромни успеси на светската музичка сцена, како и Ибица, дестинацијата која со години е еден од најважните центри на светската електронска музика.

Меѓу илустрациите се наоѓа и Џек Бек, неговиот музички проект со кое Гета се врати кон хаус и денс звукот, додека песната „Titanium“ е претставена преку препознатливи музички бранови – визуелен детаљ кој на јакната ѝ дава дополнителна динамика.

И десниот ракав носи низа интересни симболи и музички асоцијации.

Таму е насликана волчица поставена над македонските планини, мотив во кој се спојуваат природата и симболиката на Македонија со уметничкиот израз на дизајнерот. Следува и Купидон, како асоцијација на еден од големите хитови на Гета – „When Love Takes Over“, дополнет со син музички бран во ритамот на песната.

На јакната свое место најдоа и „Pirate Radio“, како потсетување на неговите музички почетоци, како и симболите „One Love“ и „Future Rave“, кои се дел од препознатливиот музички свет и развој на францускиот диџеј.

Целата идеја е јакната да не биде само модно парче, туку личен и визуелен музички запис, во кој секој детаљ носи порака и потсетува на одреден момент од кариерата на Гета или на неговото гостување во Македонија.

Ваквиот подарок до светската музичка ѕвезда е уште еден пример како македонската креативност може да најде начин да се претстави пред глобалната публика – овојпат преку мода, уметност и музика.

„Јакната ја завршивме релативно брзо, но тоа е затоа што во изминативе 6 дена, целиот S-тим работеше на неа деноноќно, во координација со тимот на Дејвид. За мене најважно е светските ѕвезди од Македонија да си отидат со најдобри впечатоци и најквалитетно парче уметност, нешто што мислам дека Гета вчера го доби“, вели Грабулоски.