Го имате овој стар мобилен телефон дома? Колекционерите за него даваат сума колку за добар стан
Додека повеќето паметни телефони почнуваат да ја губат вредноста веднаш штом ќе излезат од кутијата, кај ретките технолошки колекционерски предмети важи сосема поинакво правило. Тоа најдобро го покажува оригиналниот iPhone од 2007 година, чии неотворени примероци денес достигнуваат неверојатни цени.
Еден таков iPhone од првата генерација, со само четири гигабајти меморија, неодамна на аукција бил продаден за дури 190.372 долари, односно повеќе од 185.000 евра.
Аукциската куќа „LCG Auctions“ првично ја проценила вредноста на уредот на меѓу 50.000 и 100.000 долари, додека почетната понуда изнесувала 10.000 долари. По 28 онлајн понуди, цената повеќекратно ги надминала очекувањата.
Посебна вредност на овој модел му дава неговата реткост. Кога Стив Џобс во јануари 2007 година го претставил првиот iPhone, Apple понудил верзии со четири и осум гигабајти меморија. Моделот со четири гигабајти чинел 499 долари, додека верзијата со двојно повеќе меморија била поскапа за 100 долари.
Поради послабата продажба, „Apple“ го повлекол моделот со четири гигабајти од понудата само неколку месеци по лансирањето. Токму поради толку краткиот период на производство, денес е значително поредок од верзијата со осум гигабајти, што го прави особено интересен за колекционерите.
Вредноста на ваквите уреди не ја одредува само нивната старост. Пресудно е тие да бидат целосно нови и зачувани во оригиналното фабричко пакување.
Познат е случајот со Американката Карен Грин, која го добила првиот iPhone на подарок, но поради проблеми со компатибилноста со мобилната мрежа никогаш не го користела. Телефонот со години го чувала во плакар, сè уште запакуван.
Таквата одлука подоцна се покажала како многу вредна. Колекционерите особено ги ценат уредите кои имаат оригинална амбалажа и фабричка фолија, додека отворените или користените примероци вредат значително помалку.
Експертите предупредуваат и на обиди за повторно пакување на старите уреди со цел да изгледаат како нови. Поради тоа, аукциските куќи внимателно ги проверуваат сериските броеви, амбалажата и другите детали за да ја утврдат автентичноста.
Првиот iPhone денес има посебен статус не само поради својата реткост, туку и поради влијанието што го имал врз технолошката индустрија.
Кога Стив Џобс го претставил, го опишал како уред кој обединува телефон, музички плеер и интернет-комуникатор. Неговиот екран чувствителен на допир и едноставниот кориснички интерфејс ги поставија темелите на начинот на кој денес ги користиме паметните телефони.
Речиси две децении подоцна, првиот iPhone остана еден од најпрепознатливите технолошки производи на сите времиња, а ретките целосно зачувани примероци станаа вистински колекционерски бисери.
