Еден од таквите рецепти се пилешките батаци со компири и моркови, кои се подготвуваат во еден сад и се комбинираат со ароматичен слатко-пикантен сос. Во продолжение ви го пренесуваме рецептот за ова едноставно јадење.

Потребни состојки:

• 8 пилешки батаци
• 1 лажичка сол
• ½ лажичка црн бибер
• 1 лажичка суво оригано
• 2 лажици маслиново масло
• 20 гр. путер
• 3 моркови
• 600 гр. компири
• 3 чешниња лук
• грст свеж магдонос

За сосот:

• 3 лажици мед
• 4 лажици сладок чили-сос
• сок од половина лимон
• 2 лажици соја сос
• 1 лажица сенф

Подготовка:

Пилешките батаци измијте ги и добро исушете ги со хартиена салфета, а потоа зачинете ги со сол, бибер и суво оригано. Додајте малку маслиново масло и втријте ги зачините за рамномерно да се распоредат по месото.

Компирите по желба излупете ги и исечете ги на поголеми парчиња. Морковите исечете ги на кругови или подебели стапчиња. Лукот ситно исечкајте го, а магдоносот иситнете го.

Во поголема длабока тава или сад што може да се користи во рерна, загрејте ги маслиновото масло и путерот. Додајте ги батаците и печете ги на средно силен оган околу пет минути од секоја страна, додека кожичката не стане златнокафеава и крцкава.

Извадете ги запечените батаци од тавата и оставете ги настрана. Маснотијата и соковите што останале во тавата не отстранувајте ги, бидејќи токму тие дополнително ќе го збогатат вкусот на зеленчукот.

Во истата тава ставете ги морковите и компирите, па динстајте ги неколку минути во маснотијата и соковите од пилешкото. Повремено промешувајте и продолжете со готвењето додека зеленчукот не почне да омекнува. Потоа додајте ги лукот и магдоносот и сè заедно динстајте уште околу една минута. Внимавајте лукот да не изгори за да не добие горчлив вкус.

За подготовка на сосот измешајте ги медот, слаткиот чили-сос, сокот од лимон, соја сосот и сенфот. Мешајте додека сите состојки не се соединат и не добиете хомогена смеса. Ако сакате поизразен кисел вкус, додајте уште малку сок од лимон, додека поголема количина чили сос можете да употребите за попикантна верзија.

Вратете ги запечените батаци во тавата и распоредете ги меѓу зеленчукот. Сè прелијте со подготвениот сос така што ќе ги опфати и пилешкото и зеленчукот.

Ставете ја тавата во претходно загреана рерна на 200 степени и печете околу 30 минути. Јадењето е готово кога пилешкото е целосно испечено, компирот е мек, а сосот густ и лесно карамелизиран.

Ако сакате особено крцкава кожичка, пред крајот на печењето можете да ја вклучите функцијата за грил на неколку минути. Бидете внимателни бидејќи медот во сосот може брзо да изгори.

Пилешкото послужете го веднаш, заедно со печените компири и моркови, а врз месото можете да додадете уште малку сос од тавата. Со ова јадење одлично ќе се вклопи едноставна свежа салата.