Џим Кери се оженил. Портпаролот на 64-годишниот актер во средата за „People“ потврдил дека се оженил со партнерката Мин А. Тие се венчаа седум месеци по заедничкото појавување на доделувањето на наградите „Цезар“ во Франција. Кери тогаш ја нарече Мин А своја „прекрасна партнерка“ во говорот што во целост го одржа на француски јазик.

„Им благодарам на моето прекрасно семејство, на ќерка ми Џејн и на внукот Џексон. Ве сакам сега и засекогаш. Ѝ благодарам на мојата прекрасна партнерка Мин А“, рече тој на француски јазик, додека публиката со овации ги награди неговата ќерка, внукот и партнерката. „Те сакам, Мин А. И на крајот, му благодарам на најдуховитиот човек што некогаш сум го познавал – на мојот татко Перси Џозеф Кери, кој ме научи на вредноста на љубовта, великодушноста и смеата“.

„Имам доволно“

Ѕвездата на филмот „Ace Ventura“ е позната по тоа што ретко зборува за својот приватен живот. Во април 2022 година, за време на промоцијата на филмот „Sonic: Superhedgehog“, во интервју за „Access Hollywood“ рекол дека размислува да се повлече од актерството за да ужива во помирен живот.

Кога водителката Кит Хувер го прашала дали навистина сериозно размислува за тоа, Кери одговорил: „Прилично сум сериозен“.

„Зависи“, објаснил тој. „Ако ангелите ми донесат сценарио напишано со златно мастило и ми дадат до знаење дека станува збор за нешто што на луѓето ќе им биде многу важно да го видат, можеби ќе продолжам да глумам. Но засега земам пауза“.

Тој рекол дека го цени животот далеку од очите на јавноста, во кој може да се занимава со сликање и да поминува време со семејството.

„Многу го сакам мојот мирен живот, сакам да сликам и го сакам мојот духовен живот. Чувствувам дека имам доволно, а тоа е нешто што од некоја славна личност можеби никогаш повеќе нема да го слушнете“, изјавил тој.

Претходни врски и бракови

Кери претходно беше во врска со Џинџер Гонзага, колешка од серијата „Kidding“. Заедно првпат се појавија на црвениот тепих во јануари 2019 година, кога портпаролот на актерот за „People“ потврди дека се во врска. Во октомври истата година, „Us Weekly“ објави дека раскинале по помалку од една година.

Актерот претходно беше во брак со Лорен Холи, со која глумеше во филмот „Dumb and Dumber“, од 1996 до 1997 година. Со својата прва сопруга Мелиса Вомер, со која ја има ќерката Џејн, беше во брак од 1987 до 1995 година.