Шефот на „Ford“ смета дека е предоцна да се спаси Европа од Кинезите, иако токму тој им ја отвори вратата

Претходно Фарли ги фалеше кинеските производители, ги посетуваше нивните фабрики, возеше „Xiaomi SU7“ и дури признаваше дека инженерите на „Ford“ расклопувале кинески автомобили за да учат од нив.

Меѓутоа, сега тврди дека Европа веќе речиси е невозможно да се спаси од кинеската конкуренција и ги повикува САД да не дозволат да завршат во истата ситуација.

Фарли наведува дека кинеските брендови во август достигнале удел од 11,7 отсто на европскиот пазар, со раст на продажбата од дури 111 отсто, на речиси 100.000 возила месечно.

Но, тука настанува големиот парадокс. Истиот Џим Фарли кој предупредува на кинеската доминација штотуку потпиша договор со „Geely“, со кој кинеската компанија добива пристап до фабриката на „Ford“ во Шпанија. Таму ќе произведува сопствени автомобили, додека некои модели на „Ford“ ќе се произведуваат на платформите на „Geely“.

Со други зборови, „Ford“ истовремено предупредува на Кинезите и им ја отвора вратата на сопственото европско производство.

„Ford“ веќе со години губи пазарен удел, ги повлекува достапните модели како „Fiesta“ и „Focus“ и сè повеќе се потпира на туѓ инженеринг. Просторот што „Ford“ го напушта, кинеските компании го заземаат со огромна брзина.

Фарли вели дека „Ford“ ќе продолжи да соработува со Кинезите таму каде што тоа има економска смисла, но истовремено директно ќе се натпреварува со нив.

Проблемот е што Кинезите во тој случај не добиваат само пристап до пазарот, туку добиваат технологија, производствени процеси и увид во работењето на западниот производител, додека „Ford“ истовремено станува зависен од нивните платформи.

Кина за само четири години го зголеми извозот на автомобили од три на 12 милиони годишно.

Затоа е јасно зошто шефот на „Ford“ денес се бори против последиците од процесот на кој и самиот му помогна да ги отвори вратите. А додека западните производители расправаат како да ги запрат Кинезите, тие продолжуваат да го зголемуваат производството, извозот и технолошката предност.