Словенечкиот портал „Метрополитен“ пишуваше за градот на челикот во БиХ.

Зеница веројатно не е првиот град на кој помислуваме кога планираме патување во Босна и Херцеговина. Нема препознатливи знаменитости како Стариот мост во Мостар, Башчаршија во Сараево или тиркизните водопади чии фотографии ги преплавија социјалните мрежи во последните години.

Сепак, зад неговиот суров индустриски изглед се крие историја што датира од пред илјадници години.

Приказната за овој град во Босна и Херцеговина не започнала со железарницата или Југославија. Археолошки остатоци од периодот помеѓу 3000 и 2000 година п.н.е. се пронајдени во областа на Зеница, додека пак исто така има и траги од населби од бронзеното и римското време. Сето ова му дава на градот исклучителна историска вредност.

Популарната култура, исто така, придонесе за препознавањето на Зеница. Групата „Забрањено пушење“ ја објави песната „Зенички блуз“ во 1984 година, која го поврза градот со уште една од неговите познати институции - затворот. Песната стана еден од најпрепознатливите хитови на оваа група.

Историјата на средновековна Босна е напишана тука

Важен дел од историјата на Босна и Херцеговина е скриен меѓу улиците на Зеница.

Денес, Билино поле е најпознато по фудбалскиот стадион каде што репрезентацијата на БиХ ги игра своите натпревари. Сепак, токму во оваа област во 1203 година, за време на босанскиот Бан Кулин, била усвоена познатата Билинополска декларација.

Овој настан е поврзан со религиозните и политичките притисоци врз средновековна Босна, а документот се смета за едно од најважните историски сведоштва од тој период.

Зеница се буди: Зад индустрискиот лик, се крие неочекувана убавина

Додека центарот на Зеница сè уште открива траги од нејзиното индустриско минато, сликата целосно се менува кога ќе се упатите кон север по долината на реката Босна.

Над тесниот речен кањон се издига Врандук, стара утврдена населба со средновековна тврдина сместена на карпест рид.

Реката Босна тука прави кривина, додека камените куќи и тврдина се поставени по стрмна падина. Ова е другата, помалку позната Зеница што многу посетители не ја очекуваат.

Иако на прв поглед не изгледа како типична туристичка дестинација, Зеница може брзо да ги освои посетителите. Како што истакнуваат туристичките работници, нејзината исклучително интересна историја и зеленилото што ја опкружува многу придонесуваат за ова.