Иранската студентка Наџмех Амини е осудена на смрт поради објава на социјалните мрежи што властите ја оценија како навреда за пророкот Мухамед. Оваа 23-годишна девојка моментално се наоѓа во затвор во Машхад; пресудата сè уште не е правосилна и таа може да поднесе жалба до Врховниот суд.

Во посебен случај, таа е осудена на 12 години, шест месеци и еден ден затвор под обвиненија за дејствување против националната безбедност и ширење пропаганда против режимот.

Амини беше уапсена за време на протестите во јануари. Минатиот месец, таа од затворот упати апел за помош до меѓународната заедница. „Не сакам да се претставувам како хероина. Сакам само едно: бидете мојот глас“, рече таа во аудио-порака, повикувајќи ги Обединетите нации, адвокатите и организациите за човекови права да го истражат нејзиниот случај.

Судијата ја отфрли нејзината одбрана

Според иранскиот весник „Хорасан“, Амини му кажала на судот дека ја напишала објавата откако конзумирала халуциногени печурки со пријатели. Нејзиниот адвокат тврдел дека станувало збор за ненамерен пропуст во говорот, но судијата ја отфрлил одбраната. Според извештајот на весникот, тој прашал зошто, во таа иста состојба, таа не навредила други луѓе или противници на режимот, како што се САД и Израел.

Иранскиот закон предвидува смртна казна за навреда на пророкот Мухамед. Сепак, смртните казни за такви дела се ретки. Последните познати погубувања поради богохулење се случија во 2023 година, кога беа погубени двајца мажи откако беа осудени поради нивните активности на социјалните мрежи. Организациите за човекови права предупредуваат на зголемената употреба на смртната казна во Иран. Организацијата „Иран Хјуман Рајтс“ (Iran Human Rights) објави дека оваа година се погубени повеќе од 600 луѓе.