Некогашниот кошаркар на Њујорк Никс во средата ја завршил Полициската академија во округот Мајами-Дејд на Флорида, по речиси 11 месеци напорна обука. Сега го очекува нова работа – ќе работи како полицаец задолжен за безбедноста во училиштата.

Веста за неговото дипломирање на академијата беше објавена на Инстаграм, заедно со фотографии од свеченото доделување на дипломите.

Од академијата потсетија на неговата богата кошаркарска кариера, во текот на која шест пати учествувал на НБА Ол-стар натпреварот, во 2003 година ја освоил наградата за најдобар дебитант во лигата, а подоцна бил примен и во Кошаркарската куќа на славните.

Тие истакнаа и дека во текот на кариерата играл за неколку познати НБА-тимови, меѓу кои и Мајами Хит. Стадемаер особено се истакнал и за време на полициската обука, поради што ја добил наградата „Хари Коуч Еверет“ за придонес во успешното завршување на програмата.

„Уште како дете сакав да бидам полицаец“

Иако со години беше еден од попознатите НБА-кошаркари, Стадемаер открил дека работата како полицаец всушност била негов детски сон.

„Тоа сакав да го работам уште од детството. Се сеќавам дека во основно училиште, на денот кога разговаравме за идните професии, нè прашаа што сакаме да бидеме кога ќе пораснеме. Мојот прв одговор беше – полицаец“, изјавил тој за „Спортс илустрејтед“.

Открил и дека неколку членови на неговото семејство работат во полицијата.

„Мојот чичко беше командир, а неговиот брат заменик-командир. Мојот братучед е командир, а сестра ми посетува полициска академија. Тоа кај нас практично е семејна традиција“, објаснил тој.

„Обуката беше потешка од играњето во НБА-лигата“

Стадемаер поминал речиси 11 месеци на полициската академија, во текот на кои морал да го совлада теоретскиот дел од наставата, но и бројни физички напорни вежби.

Интересно е што признал дека полициската обука во некои делови му била дури и понапорна од професионалното играње кошарка.

„Всушност, беше малку потешко бидејќи сега трчам многу повеќе. Во НБА-лигата главно трчаш на пократки растојанија, додека на полициската академија се трча на долги патеки“, раскажал тој.

Тој открил и дека неговата сопруга на почетокот не била воодушевена од неговата одлука, бидејќи била загрижена поради опасностите што ги носи полициската професија.

„Меѓутоа, ако си добро обучен и ги познаваш процедурите, можеш да се погрижиш за сопствената безбедност, а тоа е најважно“, порачал тој.

Претходно имал проблеми со законот

Интересно е што Стадемаер пред неколку години и самиот имал проблеми со полицијата. Во декември 2022 година бил уапсен под сомнение дека удрил една од своите ќерки. Меѓутоа, обвиненијата против него биле отфрлени во јануари 2023 година.

Минатата година бил примен во престижната Кошаркарска куќа на славните „Нејсмит Меморијал“ во американскиот град Спрингфилд, со што добил едно од најголемите признанија во светот на кошарката.

Кошаркарската кариера ја заврши пред шест години

Стадемаер е роден во 1982 година на Флорида, а професионалната кошаркарска кариера ја започнал во 2002 година во Феникс Санс. Таму се афирмирал како еден од најдобрите високи играчи во НБА-лигата.

Во 2010 година преминал во Њујорк Никс, каде што играл до 2015 година. Потоа настапувал за Далас Маверикс и Мајами Хит.

Кариерата ја продолжил и надвор од САД, играјќи за Хапоел Ерусалим, кинескиот Фуџијан Старџонс и израелскиот Макаби Тел Авив. Професионалната кошаркарска кариера ја завршил во 2020 година.