„Tesla“ објави видео кое покажува како е да се „лета“ во новиот „Roadster“
„Tesla“ објави снимки од внатрешноста на новиот „Roadster“, направени за време на претставувањето во октомври, на кои се гледа како автомобилот без возач забрзува, се движи по рампа и доаѓа во положба во која е свртен наопаку, а потоа се превртува во воздухот и слетува на тркалата.
Снимките се објавени на официјалните канали на „Tesla“ и ја прикажуваат истата демонстрација како и на претставувањето, но од перспектива на возилото. Автомобилот се искачува по закривена рампа, се одвојува од неа додека е свртен наопаку и за околу една секунда слетува на тркалата. Притоа користи потисници на компримиран гас.
Во автомобилот за време на демонстрацијата немало никого. Компанијата „Tesla“ објави снимки од повеќе различни агли на различните акробации изведени на настанот, кој предизвика голем интерес, но и значителен скептицизам.
За контролиран лет, односно безбедно враќање на земјата, „Roadster“ користи систем на потисници со ладен гас. Станува збор за азот под притисок до 10.000 psi, односно околу 690 бари, во резервоар со капацитет од 200 литри, сместен зад кабината. Полнењето на резервоарот трае од два до шест часа, а „Tesla“ наводно сака да го скрати времето на помалку од половина час. Сè уште не е познато каде и како ќе се полни резервоарот.
„Tesla“ планира почеток на производството во 2028 година. Основната верзија „Performance“ нема да има потисници. Верзијата „Thrust“ добива потисници на задниот дел за забрзување од 0 до 100 км/ч. за помалку од две секунди. „Rocket“ би требало да биде едносед наменет за акробации.
„Roadster“ со потисници засега е само прототип и мала е веројатноста дека таквата верзија некогаш ќе биде легална за возење по јавните патишта.
