Што значат броевите и буквите на страничниот ѕид на пневматикот и како со нивна помош, пред купувањето, да ја проверите неговата вистинска старост, носивост и максимална дозволена брзина.
На бочната страна на секоја автомобилска гума се наоѓа низа од броеви и букви кои на прв поглед може да изгледаат како случајна комбинација.
Меѓутоа, секоја од овие ознаки има свое значење и на возачите им дава важни информации за димензиите на пневматикот, неговата носивост, максималната брзина за која е наменет, но и за тоа кога е произведен.
Токму на ова укажува снимка објавена на Инстаграм во која се објаснети ознаките на еден пневматик. Во конкретниот пример е прикажана комбинацијата 285/40 R 110H, како и ознаката за датумот на производство 0825.
Првиот број, 285, ја означува ширината на гумата во милиметри. Тоа значи дека прикажаниот пневматик е широк 285 милиметри. Бројот 40 се однесува на висината на бочниот ѕид, која изнесува 40 проценти од ширината на гумата. Во овој случај, тоа се 114 милиметри.
Буквата R означува радијална конструкција на пневматикот, која денес е стандард кај автомобилите. Иако многу возачи токму овој податок го поврзуваат со дијаметарот на бандажот, тој всушност го означува начинот на изработка на гумата. Дијаметарот на бандажот се означува со посебен број што доаѓа по буквата R, односно во овој случај тоа е бројот 22.
Особено е важно да се обрне внимание на ознаките што се наоѓаат по димензиите. Бројот 110 го претставува индексот на носивост, односно податокот за тоа колкаво оптоварување може да издржи една гума.
Во прикажаниот пример, индексот 110 значи дека максималната носивост на еден пневматик изнесува 1060 килограми. Тоа не значи дека автомобилот може да превезува 4240 килограми, бидејќи вкупното дозволено оптоварување зависи и од конструкцијата на возилото, осовините и податоците пропишани од производителот.

Буквата H го претставува брзинскиот индекс. Тој ја означува најголемата брзина за која е наменет пневматикот, а во овој случај таа изнесува 210 километри на час. Постојат различни брзински индекси, па така, на пример, ознаката T одговара на брзина до 190 км/ч, V до 240 км/ч, W до 270 км/ч, додека Y означува брзина до 300 км/ч.
Поради тоа, не е доволно гумата да одговара на автомобилот само според ширината и висината. Важно е да ги има и соодветниот индекс на носивост и брзинскиот индекс, во согласност со спецификациите на производителот на возилото.
Друга ознака што возачите не треба да ја занемарат е датумот на производство. Таа најчесто се наоѓа во рамките на ознаката DOT и се состои од четири цифри.
На гумата прикажана во снимката стои бројот 0825. Првите две цифри ја означуваат неделата на производство, а последните две годината. Тоа значи дека овој пневматик е произведен во осмата недела од 2025 година.

Овој податок може да биде корисен при купувањето нови гуми, особено ако возачот сака да провери колку долго пневматикот бил складиран пред да пристигне во продавницата.
Сепак, датумот на производство не е единствениот показател за состојбата на гумата. На нејзиниот работен век и безбедноста влијаат и начинот на складирање, условите на возење, одржувањето, притисокот и евентуалните оштетувања. Затоа треба да се проверат и состојбата на шарата, страничните ѕидови и евентуалните пукнатини.