Одлуката на Трамп ќе значи главоболка и за Најк – Царините кон една земја би можеле да создадат хаос

Со години наназад, трговците на мало, како и многу популарни брендови, се свртеа кон Виетнам за производство на стоки од патики до мебел.

Јужниот сосед на Кина стана популарна алтернатива за компаниите кои се обидувале да го избегнат вкрстениот оган на американските трговски тензии со Пекинг. Сега, откако Трамп ги прошири своите царини, Виетнам се најде во неволја.

Трамп изјави дека ќе воведе царини од 46 отсто на увозот од Виетнам, одлука што може да ги зголеми трошоците за големите компании како Најк, Американ Игл и Вејфер.

Во фискалната 2024 година, фабриките во Виетнам произвеле 50 отсто од сите обувки на Најк – убедливо најголемиот пазар. Фабриките во Виетнам, исто така, произвеле 28 отсто од целата облека на Најк, што го прави негов најголем пазар.

„Проширените царини би можеле да ги запрат или забават напорите на Најк да го оживее својот бренд и да ја подобри продажбата под раководство на новиот извршен директор Елиот Хил, ветеран на компанијата кој го презеде кормилото минатата есен“, пишува „CNBC“.

Акциите на Најк паднале за повеќе од шест отсто во средата, а исто така и Адидас како и другите големи производители на обувки многу се потпираат врз Виетнам.

Виетнам брзо се појави како најважниот производствен пазар на Најк. Во 2001 година, на пример, Виетнам сочинувал само 13 отсто од производството на обувки на компанијата и не бил вклучен во списокот од 12 земји кои го сочинувале најголемиот дел од производството на Најк.

Десет години подоцна, во 2011 година, виетнамските фабрики произвеле 39 отсто од обувките на Најк, а во однос на облеката биле на трето место.