[ВИДЕО] Тенко, најтенко: "Samsung" официјално го претстави "Galaxy S25 Edge" – ова е цената!

Како што и се очекуваше, телефонот е исклучително тенок – само 5,8 mm. Тежи само 163 грама, а за да се постигне ваква димензија, жртвуван е капацитетот на батеријата – вградена е батерија со капацитет од 3.900 mAh. Целосните димензии на уредот се 158.2 × 75.6 × 5.8 mm.

Се полни преку кабел со моќност до 25 W, а според "Samsung", со оригинален адаптер достигнува 55% за „околу 30 минути“. Поддржано е и безжично полнење.

"S25 Edge" има 6.7-инчен "Dynamic AMOLED 2Ks" екран со "QHD+" резолуција, променлива стапка на освежување од 1 до 120 Hz, и "Corning Gorilla Glass Ceramic 2" како заштита. Телефонот го придвижува "Snapdragon 8 Elite for Galaxy" процесорот, во комбинација со 12 GB RAM и 256 GB или 512 GB интерна меморија.

На задната страна се наоѓа главната камера со 200 MP, f/1.7 отвор и "OIS" стабилизација. Од "Samsung" тврдат дека овозможува „2x оптички квалитетен зум“ – истата леќа како кај врвниот "S25 Ultra" модел.

До неа е сместена и 12 MP ултраширока камера со f/2.2 отвор и автоматски фокус за макро фотографии. За селфи е задолжена 12 MP предна камера со ист отвор на бленда.

"Galaxy S25 Edge" работи на "Android 15" со "One UI 7", има "IP68" сертификат за отпорност на прашина и вода, а куќиштето е изработено од титаниум. Ќе биде достапен во „впечатлив спектар на бои“, како што вели "Samsung", вклучувајќи ги: "Titanium Silver", "Titanium Jetblack" и "Titanium Iciblue".

"Galaxy S25 Edge" е веќе достапен за преднарачка, а почетната цена изнесува 1.099 долари за моделот со 256 GB.