"BMW M" веќе потврди дека работи на нов суперавтомобил, кој потенцијално би можел да биде наследник на легендарниот "M1" од доцните 1970-ти. Иако официјални детали сè уште нема, оваа вест веќе ги инспирираше бројните автомобилски дизајнери. Една од највпечатливите визии доаѓа од независниот дизајнер Себастијан Чарча, кој замисли сопствена верзија на егзотичниот "BMW" од новата генерација и го нарече "Ethos".
Овој дигитален концепт потсетува на култниот прототип "BMW Nazca C2" од раните 1990-ти, дизајниран од "Italdesign". Во него се препознаваат и елементи од "BMW i8", како и од концептот "Vision M Next" од 2019 година, кои го обликуваа поновиот дизајнерски идентитет на брендот.
Низок, широк и впечатлив
"BMW Ethos" има исклучително спортски став – е низок, широк и аеродинамичен. Кабината е целосно застаклена и го покрива целиот кокпит, а делумно откриените задни тркала потсетуваат на класичните италијански спортски автомобили. Напред се наоѓа препознатливата "BMW" решетка, но во модерна форма – во бојата на каросеријата, со мал "BMW" логотип дискретно поместен на страна. Според Чарча, решетката е инспирирана од класичните "BMW" модели од 1950-тите, како 503 и 507.
"LED" светлата се интегрирани во отворите за воздух на начин што потсетува на "Peugeot 9×8 Le Mans Hypercar". Надворешните крила се нагласени и доминантни, давајќи му мускулест и моќен изглед. Чарча го опишува дизајнот како „контраст меѓу меки и остри линии“.
Задниот дел содржи тенка "LED" лента што се протега по целата ширина, активен заден спојлер и голем дифузер – сите елементи што го засилуваат спортскиот карактер на возилото.
Погон од иднината
"Ethos" нема видлив мотор со внатрешно согорување, но не е ниту замислен како целосно електричен. Наместо тоа, дизајнерот предлага погон базиран на водородни горивни ќелии, што би овозможило перформанси слични на оние кај денешните хиперавтомобили. Така се отвора простор за различни технолошки решенија во иднина.
Чарча го замислил својот концепт во елегантна шампањ боја и го сместил во соодветна околина – "Concorso d’Eleganza Villa d’Este" покрај езерото Комо во Италија. На истата локација "BMW" неодамна ги претстави лимитираните модели "Speedtop", "Skytop" (2024) и "Touring Coupe" (2023).
Како потенцијални ривали на Ethos, Чарча ги гледа елитните суперавтомобили како "Alfa Romeo 33 Stradale", "Aston Martin Valhalla", "Ferrari F80", а можеби и најблискиот конкурент – концептот "Mercedes-AMG Vision One-Eleven".
Кој е Себастијан Чарча?
Себастијан Чарча е италијански автомобилски дизајнер со седиште во Гетеборг, Шведска. Студирал на "IAAD" (Институт за применета уметност и дизајн во Торино), а работел за познати брендови како "Alfa Romeo", "Fiat", "Rimac" и "Volvo". Неговите креации може да се погледнат на Instagram.
