Околу вулканот Маунт Рејнир во американската држава Вашингтон, на западниот брег, е регистрирана „најзначајната сеизмичка активност“ во повеќе од 15 години, кога „рој“ од стотици мали земјотреси ја погоди локацијата почнувајќи од вторник, според податоците од Опсерваторијата за вулкани Каскада на Американскиот геолошки завод.
Ројот, или поточно стотици мали земјотреси, кои ја погодија истата област, започнале околу 1:30 часот по локално време во вторник и продолжиле до среда, покажаа податоците, пренесе „CBS News“.
Вулканолозите веруваат дека е само прашање на време кога Рејнир, веројатно најопасниот вулкан во САД, ќе има ерупција.
„Маунт Рејнир ме држи будна ноќе бидејќи претставува голема закана за околните населби“, изјави вулканологот Џес Феникс за Си-ен-ен уште минатата година.
Сепак, според Опсерваторијата за вулкани Каскада, која ги следи вулканите низ државите Вашингтон, Орегон и Ајдахо, засега нема причина за загриженост. Некои од земјотресите биле премногу мали за да се лоцираат.
„Земјотресите се премногу мали за да се почувствуваат на површината и веројатно ќе продолжат неколку дена. Нема да има штета предизвикана од толку мали настани“, соопшти опсерваторијата во вторник.
Последниот пат кога Маунт Рејнир се соочил со рој земјотреси било во 2009 година, кога бил погоден од 1.000 земјотреси, од кои најсилниот бил 2,3 степени според Рихтеровата скала.
Роевите вообичаено се случуваат еднаш или двапати годишно, но обично не се составени од толку многу земјотреси, соопшти опсерваторијата. Сепак, научниците сè уште учат за вулканот, кој е активен и внимателно следен од 1980-тите.
Опсерваторијата забележа дека сегашните високи температури на Рејнир не се поврзани со малите земјотреси и рече дека тие веројатно се предизвикани од движењето на водата околу кората над магматската комора.
Рејнир се издига на 4.275 метри надморска височина и немал значителна ерупција во последните 500 години, според Геолошкиот завод на САД.
