Неверојатен успех

Кјара го стекна своето богатство преку блогот „The Blonde Salad“, кој го започна во 2009 година, својата линија на обувки „Chiara Ferragni Collection“, како и бројни соработки со познати брендови, што ѝ донесе огромен број обожаватели и помогна да ја зацврсти својата популарност.

„Forbes“ објави дека нејзината заработка во 2023 година изнесувала 7 милиони долари. Успехот на Кјара се базираше на уникатна и персонализирана содржина, како и на користење на социјалните мрежи за промоција на својот бренд. Нејзиниот блог и модната линија станаа предмет на студии на Бизнис школата на Харвард.

Таа беше и првата модна блогерка која се појави на насловната страница на шпанското издание на „Vogue“. Како глобален амбасадор на производи за нега на коса на „Pantene“ и со кукла Барби направена по нејзиниот лик, Кјара го користеше своето влијание за промоција на брендови, но и за водење кампања против крајната десница во Италија.

Скандалот што промени сè

Сè започна со скандалот околу контроверзната кампања за божиќните колачи „Pandoro“ во 2023 година, кога италијанскиот антимонополски суд утврди дека Кјара ги довела потрошувачите во заблуда, преувеличувајќи го хуманитарниот аспект на кампањата во споредба со реалната донација.

Во извештаите се наведува дека компаниите што соработувале со Ферањи оствариле приход од над еден милион евра од продажбата на брендираните колачи, додека на сметката на болницата за лекување на деца со рак била уплатена донација од само 50.000 евра.

По изречената казна од еден милион евра, Ферањи јавно ја призна својата грешка и се извини, но штетата веќе беше направена. Некогаш непогрешливата икона, која заработуваше околу 100.000 долари по објава, стана предмет на потсмев, а нејзиниот бренд забележа драматичен пад во продажбата.

Брендот на Ферањи денес се соочува со сериозни предизвици. Според пишувањата на италијанските медиуми, приходите се значително намалени, а соработките со луксузните модни куќи веќе не се толку чести.

Развод

Минатата година, Ферањи се разведе по осум години брак од најпознатиот италијански рапер Федез, со кого има две деца.

Моментално е во љубовна врска со Џовани Тронкети Провера, претприемач и менаџер, кој беше покрај неа во текот на целиот тежок процес на разводот од раперот.