Современото мерење на интелигенцијата започнало дури во 1905 година, кога францускиот психолог Алфред Бине и психијатарот Теодор Симон го претставиле првиот IQ тест. Тоа значи дека сите проценки за историските личности пред тој период се чисто хипотетички. И покрај тоа, на личности како Шекспир, Гете, Волтер или Томас Вулзи повремено им се припишувале импресивни резултати.

Највисокиот официјално забележан IQ ѝ припаѓа на Мерилин вос Савант, која влезе во „Guinness“ книгата на рекорди со резултат од 228. По нејзиниот случај, во 1985 година, „Guinness“ книгата на рекорди престана да бележи IQ резултати, повикувајќи се на големата научна дебата околу веродостојноста и споредливоста на тестовите.

Човекот кој себеси се нарекува „најпаметниот на светот“

Во оваа нејасна ситуација се појавува јужнокорејскиот научник Јанг Хун Ким, кој тврди дека има IQ од 276 и себеси се опишува како најпаметниот човек на светот. Многумина го оспоруваат неговото тврдење, иако тој е член на „Giga Society“, исклучително ексклузивен клуб кој прима само лица со IQ над 190 и брои само девет членови ширум светот. Кредибилитетот на ваквите организации наиде на остри критики, дури и од страна на меѓународните медиуми.

Надвор од бројките, Ким предизвика реакции и со своите јавни ставови за религијата. Како деклариран христијанин, тој тврди дека Бог апсолутно постои и дека Исус и Бог се иста личност. Во објава на „X“ („Twitter“) напиша: „Како личност со највисок IQ на светот, верувам дека Исус Христос е Бог, патот, вистината и животот.“

Јанг Хун Ким не застанува тука. Тој јавно го изрази своето мислење за тоа што се случува по смртта, обидувајќи се да ги поврзе религиозните верувања со квантната физика. Според него, свеста не е само мозочна активност, туку нешто подлабоко. „Квантната физика вели дека информацијата никогаш не исчезнува, туку само ја менува формата. Ако свеста е квантна информација, тогаш таа може да продолжи да постои и по смртта на телото“, тврди тој.

Тој го споредува човечкиот мозок со локален уред, а постоењето по смртта со некакво „cloud“ складиште, тврдејќи дека квантното испреплетување покажува дека свеста е дел од поголем систем надвор од физичкиот свет.

Ким заклучува дека науката и верата не се во судир, туку можат да функционираат комплементарно. „Науката постојано се развива и дознаваме сè повеќе за свеста и реалноста. Смртта не е уништување, туку промена и транзиција. Човештвото ќе продолжи да трага по вистината за тоа што постои потоа“, вели тој.

Без разлика дали станува збор за научна хипотеза или лично убедување, изјавите на Јанг Хун Ким покажуваат дека дебатата за интелигенцијата, свеста и верата останува отворена и длабоко контроверзна.