Овие играчки денес будат силна носталгија, но освен убави спомени, би можеле да ви донесат и неочекувана заработка. Имено, некои од тие подароци од детството денес вредат стотици, па дури и илјадници евра.

Фурби

Децата од деведесеттите добро се сеќаваат на Фурби, интерактивна играчка која беше божиќен хит. Денес одредени модели вредат вистинско богатство, особено ако станува збор за ограничени изданија или оригинален Фурби во неотворено пакување.

Вредноста зависи од состојбата, но постарите играчки на „eBay“ се продаваат за околу стотина евра, додека оние во оригинална кутија достигнуваат и до 250 евра. Некои ретки модели, како оние украсени со драгоцени камчиња, наводно биле продадени и за неколку илјади евра.

Поли Покет (Polly Pocket)

Минијатурните куклички Поли Покет го освоија светот кон крајот на 80-тите и во текот на 90-тите, наоѓајќи се на речиси секоја листа на божиќни желби. Бидејќи „Mattel“ го презел брендот во 1998 година, оригиналните кукли Поли произведени меѓу 1989 и 1998 денес се исклучително ценети, особено ако сè уште се во оригиналното пакување.

Неодамна, една аукција на „eBay“ завршила со неверојатни околу 870 евра, додека сетот „Light-up Wedding Chapel“ од 1994 година бил продаден за речиси 290 евра. Апсолутен рекордер е „Polly Pocket Beauty Case“ од 1997 година, кој минатата година на „eBay“ достигнал вртоглава цена од околу 5.600 евра.

Барби кукли

Ретко кој во детството немал барем една Барби кукла, а многумина веројатно сè уште ги чуваат. Иако постојат десетици различни модели, одредени винтиџ или лимитирани серии денес вредат стотици евра. Како и кај повеќето колекционерски предмети, највисока цена постигнуваат куклите во совршена состојба и во оригинална кутија.

На пример, „Dream Date PJ Barbie“ од 1982 година и „Hollywood Hair Teresa Barbie“ од 1992 година неодамна на „eBay“ биле продадени за околу 390 евра секоја. „Peaches ’n Cream Barbie“ од 1984 година достигнала цена од околу 640 евра, додека лимитираното издание „Pink and Pretty Barbie“ од 1981 година се продава за износи меѓу приближно 235 и 330 евра.

Покемон карти

Општо е познато дека ретките Покемон карти можат да вредат вистинско богатство. Најпознат пример е картата „PSA Grade 9 Pikachu Illustrator“ во сопственост на јутјуберот Логан Пол, проценета на повеќе од 4,6 милиони евра.

Но и други карти постигнуваат астрономски цени – една суперретка карта била продадена во 2022 година за повеќе од 375 илјади евра, а друга за околу 40 илјади евра. Со оглед на тоа што картите се достапни со децении, дефинитивно се исплати да ги прегледате старите колекции.

Дизниеви ВХС касети

Пред ерата на стримингот, омилените филмови се гледаа на „VHS“ касети. Секој што пораснал во 80-тите и 90-тите сигурно имал колекција од Дизниеви класици како „Приказна за играчките“ или „Кралот лав“. Денес тие касети би можеле да вредат сериозни пари.

Во зависност од изданието и состојбата, цените можат да достигнат и петцифрени износи. На пример, ретко издание на филмот „101 далматинец“ во оригинално, запечатено пакување наводно било продадено на „eBay“ во 2023 година за дури околу 17.500 евра.

Фигурички „Power Rangers“

Иако врвот на популарноста го доживеаја во 90-тите, „Power Rangers“ и денес се детски класик. Ако поседувате сет оригинални акциони фигурички од почетокот на деведесеттите, би можеле да заработите стотици фунти, особено ако сè уште се во оригинално пакување.

Еден ваков сет неодамна бил продаден за повеќе од 220 евра. Дури иако вашите фигурички се без кутија, тие сè уште можат да постигнат цена од педесетина евра, што секако не е занемарливо.

Тамагочи (Tamagotchi)

Дигиталното милениче за кое требаше да се грижите беше глобален феномен откако се појави во 1997 година. Иако Тамагочи постои и денес, оригиналните изданија од деведесеттите можат да ви донесат стотици, па дури и илјадници евра.

Примероци во неотворено пакување се продаваат за околу 350 евра, но ретки модели, како „Mobile Kaitsu! Tamagotchi Plus“, можат да достигнат и до приближно 4.300 евра, како што според пишувањето на „Smithsonian Magazine“, едно лице открило во 2021 година. Вредноста зависи од верзијата, бојата и реткоста.

Кукли „Spice Girls“

Во октомври 1997 година, секој обожавател на групата „Spice Girls“ ги посакувал куклите со ликовите на омилените пејачки. Сетот од пет кукли бил достапен до 1999 година, а по заминувањето на Гери Халивел, „Hasbro“ издал верзија со четири членки.

Ако сè уште ја чувате вашата кукла „Scary“, „Ginger“, „Baby“, „Sporty“ или „Posh“, можеби е време да размислите за продажба. На „eBay“ се продаваат за стотици евра: комплетен сет неодамна постигнал цена од околу 690 евра, додека една кукла „Viva Forever Posh Spice“ била продадена за приближно 330 евра.

Играчки од „Happy Meal“

„Happy Meal“ на Мекдоналдс беше омилено детско задоволство, не само поради храната, туку и поради играчката што се добивала во кутијата. Многу од тие играчки биле дел од колекционерски серии, па ако сте ги зачувале, би можеле да ви донесат заработка. Ресторанот соработувал со брендови како „Pokémon“, „Beanie Babies“ и „Disney“, а комплетните сетови денес постигнуваат пристојни цени.

Комплетен сет Покемон играчки од „Happy Meal“ на „eBay“ се продава за повеќе од 165 евра, додека колекција фигурички Минионс достигнува цена од околу 410 евра.