[ВИДЕО] Се појави „работа од соништата“ со плата од 35 илјади евра, сместување храна и други бенефиции: Но...
Британскиот Антарктички истражувачки сервис – БАС (BAS) отвори нови работни позиции на своите истражувачки станици на Антарктик и најавува дека во следните месеци ќе објави уште слободни позиции. Според БАС, се бараат кандидати подготвени да работат во едно од најекстремните места на Земјата, без страв од студот и долгите поларни ноќи.
Позициите се различни – од оператори на земјоделски машини, техничари за дизел енергија, капетани на пловила и нуркачи, до метеоролошки набљудувачи и радиооператори. Во наредните три месеци ќе се објават и позиции за готвачи, раководители на станици и асистенти во теренски истражувања на животни.
Плата и бенефиции
Годишната плата започнува од 30.244 фунти (околу 35.000 евра), со можност за договори од 6 до 18 месеци. Покрај платата, БАС обезбедува комплетен логистички и животен пакет – сместување, храна, патувања, специјална облека, алати и обука. Поради тоа што на Антарктикот нема трошоци за живот, вработените можат значително да заштедат за време на престојот.
Живот во поларни услови
Сепак, животот на Антарктик не е за секого. Континентот шест месеци годишно е во целосна темнина, а температурите можат да паднат до –89 степени Целзиусови. Мејк Брајан, кој управува со станицата „Rothsera“, објаснува дека секој член на тимот е важен – од столари, водоинсталатери и механичари до инженери и готвачи.
„Луѓето кои работат на нашите станици се обични луѓе, со обични работи – само на исклучително место“, вели тој.
Искуство на вработените
Се потврдува дека работата е истовремено предизвикувачка и исполнувачка. Столарот Фил Кулман, кој работи на станицата Halley VI, се придружил на БАС пред шест години и од тогаш се враќа секоја сезона.
„Работата бара прилагодување и тимска соработка. Научив вештини кои ги понесов во ‘реалниот свет’ и правев нешта за кои никогаш не мислев дека ќе имам прилика“, вели тој.
Совети за живот на Антарктик
Tикток-креаторот Мети Џордан редовно објавува видеа за животот на Јужниот пол и советува за преживување во екстремни услови. На пример, храна и пијалаци оставени надвор се замрзнуваат за миг, а на температури од –43 степени Целзиусови потребни се најмалку три слоја облека, додека на –50 степени Целзиусови се препорачуваат пет слоја, заедно со специјална јакна, ракавици, чизми и заштитни очила.
Пријавување
За сите заинтересирани, БАС ги објавува деталите за новите позиции на својата веб-страница. Во следните три месеци ќе се појават дополнителни огласи, па има доволно време за пријавување.
