Тој ја сподели веста преку социјалните мрежи, нагласувајќи дека состојбата била тешка, но дека сега се опоравува.

„Имав херпес зостер во последниот месец. Не го препорачувам, но сега сум подобро“, напиша 35-годишниот музичар.

Херпес зостер е инфекција предизвикана од истиот вирус што ги предизвикува овчите сипаници. Откако еднаш ќе се прележи оваа болест, вирусот останува во организмот и може повторно да се активира по неколку години, најчесто со болен осип и непријатна болка.

Иако не е животозагрозувачка, оваа состојба може да биде исклучително непријатна, особено поради интензитетот на болката.

Покрај здравствените проблеми, Ширан направи и драстична промена во изгледот – ја избричи главата. Како што објасни, тоа било симболичен чекор.

„Сакав да ја избричам косата како знак за нов почеток. Во моментов имам многу нови работи во животот“, напиша тој.

По двомесечна пауза, пејачот наскоро се враќа на сцената. Неговата турнеја продолжува со настапи во Латинска Америка, а првиот концерт е закажан во Доминиканската Република.

Во меѓувреме, тој откри дека неговата сопруга Чери Сиборн, по операција за отстранување тумор, е во добра здравствена состојба.

Поранешни трансформации

Ова не е првпат Ширан да ја изненади јавноста со нов изглед. Во декември минатата година, пејачот на хитот „Thinking Out Loud“ се најде на насловната страница на списанието „Men’s Health UK“, каде што покажа импресивна телесна трансформација откако ослабел речиси 14 килограми.

Музичарот позираше без маица за списанието, покажувајќи извајани стомачни мускули, и откри дека промената на животните навики била поттикната од неговото семејство.

Семејството како мотивација

Ширан, кој со сопругата Чери Сиборн има ќерки Лајра и Јупитер, својот подобрен изглед го припишува на редовно вежбање и намален внес на алкохол.

„Сè тоа се поклопи со желбата да бидам одговорен татко и да се чувствувам добро и добро да изгледам“, објасни тој.

Тогаш тој призна дека бил загрижен како обожавателите ќе реагираат на неговата нова насловна страница.

„Јас сум типот со кој луѓето можат да се поистоветат, па си помислив: По ѓаволите, дали е чудно што сум во ваква форма на насловната на 'Men’s Health'?“, изјавил тој, додавајќи дека сепак го направил тоа со надеж дека ќе ги инспирира другите.

Ширан и претходно говорел за промените – уште во 2019 година открил дека престанал да пуши и ослабел 22 килограми.