Во овој европски град милијардерите пронашле ново засолниште, квадратот достигнува и до 33 илјади евра: „Богатите стануваат уште побогати“

Станува збор за простор што со години ги привлекува најбогатите купувачи и инвеститори, но во последно време бележи уште поинтензивен прилив на странски капитал.

Сместен во елитната населба Саламанка, Златниот километар всушност е мрежа од улици полни со луксузни продавници, модни куќи и златарници. Ова подрачје често се опишува како своевиден трговски центар на отворено. Токму така го гледа и Кристина Ланзарот, претставничка на локалното здружение на трговци, која за Си-ен-ен изјавила дека станува збор за едно од најпосебните луксузни шопинг-подрачја во светот.

Но Саламанка не е привлечна само за купување — таа станува и една од најпосакуваните локации за живеење, особено меѓу странските богаташи. Прошетката низ нејзините улици открива широки авении, елегантни згради и атмосфера на ексклузивност, но вистинскиот шок доаѓа дури со цените на недвижностите.

Според податоците на градските власти, цената на квадратен метар во овој дел од Мадрид надминува 11.500 долари, додека градскиот просек е околу 6.800 долари. За многу домашни купувачи тоа е недостижно, но за странските инвеститори, особено за оние од Латинска Америка, претставува прифатлив трошок. Токму тој прилив на странски капитал ја менува структурата на населението. Додека во 2015 година странците сочинувале околу 18 отсто од жителите на оваа населба, до 2025 година нивниот удел пораснал на речиси 30 отсто. Од вкупно 44.680 странски жители, речиси половина доаѓаат од Јужна Америка.

Како што истакнала Ланзарот за Си-ен-ен, Мадрид сè повеќе станува алтернатива на градови како Мајами за богатите Латиноамериканци. Причините се бројни — од архитектонската убавина и културната блискост, до безбедноста и квалитетот на живот.

Влезот на овој пазар на недвижности бара сериозен капитал. Според Тарек Муреа, советник во агенцијата „Gilmar“, станува збор за купувачи чија финансиска моќ „ги надминува сите останати“. Како пример ја наведува продажбата на стан од 460 квадратни метри во близина на познатата Пуерта де Алкала за повеќе од 18 милиони долари.

Цените по квадратен метар во вакви случаи достигнуваат и до 39.000 долари, односно 33.000 евра, дури и за недвижности што не се новоградба.

Овие купувачи имаат и специфични преференции: бараат станови со многу природна светлина, отворени простори и големи спални соби со сопствени бањи, што го одразува нивниот животен стил.

Доаѓањето на новите богаташи ја менува и комерцијалната слика на населбата. Сè повеќе се отвораат луксузни продавници и ексклузивни златарници, додека традиционалните барови и местата со пристапна храна постепено исчезнуваат.

Како што истакнал Муре, денес во некои делови на Саламанка е тешко да се најде едноставно место за пиво и тапаси. Наместо тоа, доминираат ресторани од висока категорија, каде што еден пијалак може да чини и до 18 долари.

Овие промени имаат и пошироки последици. Долгогодишните жители сè почесто ги продаваат своите недвижности и се селат во луксузни предградија како Ла Моралеха или Ел Висо. Но со тоа растот на цените се шири и во тие подрачја, создавајќи верижен ефект на пазарот на недвижности.

Она што се случува во Саламанка некои експерти го опишуваат како необичен облик на гентрификација — не премин од сиромашно кон богато, туку од богато кон уште побогато. Така, Мадрид сè повеќе ја зацврстува својата позиција како нова европска дестинација за глобалната елита.