Замислете остров кој во себе го обединува духот на Миконос, егзотиката на Бали и луксузот на Дубаи. Бескрајни плажи, престижни хотели, марини и продавници на најпознати модни куќи полни со потрошувачи подготвени да потрошат илјадници евра за само неколку денови. Станува збор за Хајнан, познат како „Хаваите на Истокот“, кој кинеската влада забрзано го трансформира во гигантска зона на слободна трговија.

Пекинг сака Хајнан да стане место каде богатите Кинези ќе ги трошат своите пари во рамки на границите на сопствената земја.

Иако Кина е комунистичка земја, таа без двоумење ги прифаќа правилата на капитализмот кога станува збор за туризмот.

Островот се наоѓа на крајниот југ од земјата, во Јужното Кинеско Море. Додека главниот град Хајкоу е административен центар, крајбрежниот град Санја е вистински туристички бисер. Со својата тропска клима и луксузни одморалишта, Санја е најпопуларната дестинација за одмор во Кина со децении. Само во 2024 година, островот регистрирал 97,2 милиони туристички посети, а трошењето надминало 26 милијарди евра.

Контрола на богатството преку бесцарински рај

Стратегијата не е само туристичка, туку и длабоко економска. Со години, богатите Кинези купувале часовници во Токио, чанти во Париз и накит во Хонгконг, изнесувајќи милијарди долари од земјата. Хајнан е дизајниран да го промени тоа. Тоа е огромен бесцарински (duty-free) експеримент што им овозможува на граѓаните да купуваат светски брендови без да ја напуштат земјата.

Трансформацијата започна во 2018 година, кога претседателот Си Џинпинг објави дека целиот остров ќе стане зона на слободна трговија. Целта била Хајнан да стане глобален центар за трговија, инвестиции и потрошувачка со посебни даночни олеснувања до 2025 година.

Излози на светски престиж

Хајнан не е само дом на хотели, туку и на најсовремени трговски центри. Хаикоу Интернешнл фри сити е еден од најголемите објекти од ваков вид во светот – вистинска „машина за трошење“.

Во Санја, групацијата ЛВМХ (сопственик на брендови како Луј Витон) гради гигантски комплекс кој ќе биде завршен оваа година. Гиганти како Диор, Гучи, Прада, Картие, Селин и Барбери веќе ги отворија своите продавници таму.

Што се однесува до сместувањето, гостите можат да избираат од престижни имиња како што се „Atlantis Sanya“, „The Ritz-Carlton“, „Rosewood“ и „Mandarin Oriental“, пишува „Newmoney.gr“.

Помеѓу амбицијата и реалноста

Пекинг се обидува да создаде своја верзија на луксузниот животен стил. Со децении, луксузот имал западна естетика, со Париз или Монако како природна околина. Хајнан се обидува да го пресели тој екосистем во Кина.

Сепак, патот до целта не е без пречки. По пандемијата, повторното отворање на границите врати многу кинески туристи во странство, што доведе до пад од речиси 30 отсто во продажбата на бесцарински производи на островот во 2024 година. И покрај ова, државата продолжува да инвестира огромни ресурси, верувајќи дека Хајнан е лабораторија за идната кинеска потрошувачка.

Хајнан не е само „остров на милијардери“. Тоа е обид на растечка суперсила да создаде свој Монако или Сингапур. Прашањето не е дали островот ќе биде полн со петзвездени хотели, туку дали Кина може да ги убеди своите граѓани дека иднината на луксузот повеќе не е во Европа, туку токму тука – дома.