Ерлинг Халанд продолжи таму каде што застана и во клупскиот фудбал. Норвешкиот голгетер постигна два гола во победата на својата репрезентација над Ирак со 4:1 на стартот од Светското првенство, но по натпреварот вниманието го привлече со изјава која ја покажа неговата поскромна страна.
Напаѓачот на Манчестер Сити беше еден од најзаслужните за триумфот на Норвешка, а по средбата новинарите го прашаа дали се смета за најдобар напаѓач во светот во моментов, пред Хари Кејн и Килијан Мбапе.
Халанд: Статистиката вели поинаку
Норвежанецот не сакаше себеси да се стави на врвот на листата на најдобри напаѓачи.
„Би рекол дека сум некаде при самиот врв. Но, не мислам дека постигнав најмногу голови оваа сезона. Статистички гледано, не сум најдобар бидејќи мислам дека Хари Кејн и Мбапе постигнаа повеќе погодоци. Тоа е реалноста, па затоа не, не сум“, изјави Халанд по натпреварот.
Неговиот одговор предизвика бројни позитивни реакции, особено затоа што станува збор за еден од најсмртоносните напаѓачи на денешницата.
Импресивни бројки на најголемите ѕвезди
Халанд оваа сезона за Манчестер Сити постигна 38 голови на 52 натпревари, додека Хари Кејн имаше фантастична сезона во дресот на Баерн Минхен со дури 61 гол на 51 натпревар.
Килијан Мбапе исто така блескаше во дресот на „Real Madrid“, постигнувајќи 42 гола на 44 натпревари.
Сепак, без оглед на бројките, Халанд уште еднаш покажа зошто многумина го сметаат за еден од најкомплетните напаѓачи во светот.
Продолжи неверојатна традиција
Со головите против Ирак, 25-годишниот Норвежанец продолжи и една интересна серија која трае во текот на целата негова кариера.
Откако погодуваше на дебито во Бундеслигата, Премиер лигата и Лигата на шампионите, Халанд успеа да ја затресе мрежата и во својот прв настап на Светско првенство.
Норвешка на идеален начин го отвори настапот на Мундијалот, а доколку Халанд продолжи со ова темпо, би можел да биде еден од главните кандидати за „Златната копачка“ на турнирот.
