Новата заедничка колекција за сезоната пролет/лето 2027 беше претставена за време на Модната недела во Париз, среде топлотниот бран што ја погоди Франција.

Во фокусот се иновативни парчиња развиени со технологијата „Climacool“ на „Адидас“, наменети за врвни спортисти, но изведени во препознатливиот авангарден стил на Овенс.

Облека што го лади телото

Овенс со години нагласува дека физичката форма е поважна од самата облека, а неговата позната изјава дека „вежбањето е модерна висока мода“ сега доби ново значење.

Во првата заедничка колекција со „Адидас“ по 2017 година, дизајнерот претстави низа технички напредни парчиња, меѓу кои особено се издвојуваат јакните што се надувуваат во скулптурални форми.

Благодарение на технологијата „Climacool“ на „Адидас“ и вградените вентилатори, облеката активно го лади телото на корисникот.

Системот го надополнуваат волуменозни кратки панталони со вентилатори, како и елек за ладење – технологија што „Адидас“ ја разви за фудбалерите за овогодишното Светското првенство, кога натпреварите се играат на исклучително високи температури.

Овенс целиот концепт го опишува како „личен клима-уред“, односно пренослив систем за ладење на телото.

Наменето за спортисти, не за улица

Иако надуените силуети привлекоа најголемо внимание на париските писти, дизајнерот истакнува дека нивната цел не е моден спектакл. Целта е максимално да се разлади трупот на тркачот непосредно пред трката, со цел да се подобрат спортските перформанси во екстремни временски услови.

Слични решенија со години веќе се користат во Јапонија меѓу работниците кои работат на отворено, а „Адидас“ претходно експериментираше со надувлива облека за својот Формула 1 тим. Но, Овенс целата идеја ја однесе чекор понатаму, претворајќи ја функционалната технологија во впечатлив моден израз.

Препознатливиот потпис на Овенс

Освен футуристичките парчиња за ладење, колекцијата вклучува и попрактични модели, како црни патики за трчање, тренирки и панталони со долги врвки — детаљ што е заштитен знак на Овенс.

Дизајнерот изјави дека во оваа колекција сакал да ја „фетишизира“ класичната спортска облека на „Адидас“ со трите препознатливи ленти, спојувајќи ги врвната технологија и својот авангарден дизајнерски потпис во една од најоригиналните соработки во последните години.