Вака Роберт де Ниро (82) ја одржува виталноста: Актерот нема намера да се пензионира – во деветтата деценија од животот глуми и води империја од ресторани и хотели

Славниот Роберт де Ниро својот ден го започнува меѓу пет и шест часот наутро. Таа навика ја стекнал пред повеќе децении, кога пред зори се подготвувал за снимање филмови. Дури и кога има слободни денови, станува во исто време, а мирните утрински часови ги користи за читање сценарија, но и за управување со синџирот хотели и ресторани „Nobu“.

Да потсетиме, славниот актер е коосновач и косопственик на светскиот угостителски бренд „Nobu“, кој го основал заедно со славниот јапонски готвач Нобу Мацухиса. Она што започнало како воодушевување на актерот од храната во еден мал ресторан во Лос Анџелес, прераснало во империја што денес опфаќа повеќе од 50 ресторани и повеќе од 15 луксузни хотели ширум светот.

Хотелите и рестораните „Nobu“ се омилени меѓу светските ѕвезди, а гурманот и љубител на кулинарството Роберт де Ниро, кој некогаш продавал домати на пазар во Ниш, за себе избрал ваков режим на исхрана.

Појадокот на овој оскаровец е едноставен и хранлив: црно кафе, свеж сок од портокал, јајца (кајгана или меко варени), интегрален тост или традиционални њујоршки ѓевреци (bagels). Актерот избегнува екстремни диети и претпочита урамнотежена исхрана што му овозможува да одржи стабилно ниво на енергија во текот на целиот ден.

Штом ќе заврши со појадокот, му се посветува на тренингот. Под надзор на својот личен тренер, Џејмс Брејди, тренира меѓу три и шест пати неделно. Неговата рутина комбинира кардио-вежби за издржливост и тренинг со тегови приспособен на неговата возраст, со цел да ја зачува мускулната маса. За Де Ниро фитнесот е средство за дисциплина, а не естетска опсесија – му овозможува да ги издржи снимањата што траат со денови.

Легендарниот актер има рутина што за многу мажи, дури и тројно помлади од него, би претставувала голем предизвик. Но, Роберт де Ниро не прифаќа изговори и не се откажува од редовното тренирање, а има и силна волја доследно да се придржува до својот начин на исхрана.

Резултатот се енергијата и ентузијазмот благодарение на кои и во деветтата деценија од животот може да ги следи своите интереси и да ги остварува своите цели.