Нејзината реакција во директниот пренос ја видоа милиони луѓе, а видеото за помалку од два дена на платформата X собра речиси 17 милиони прегледи.

„Готово е, ќе најдат нешто“

Навивачката по име Марина сега се огласи во поткастот „Croatians Online“.

„Бевме на натпреварот во Торонто. Штом беше постигнат тој последен гол и почна ВАР-проверката, сестра ми и јас само се погледнавме и рековме: „Готово е, ќе најдат нешто“. Имавме такво чувство, а верувам не само ние две, туку и 60 до 70 проценти од навивачите. За жал, токму тоа и се случи“, раскажа Марина.

Таа додаде дека, и покрај исходот, атмосферата била извонредна.

„Разговарав со Канаѓани, а дури и Португалците признаа дека ние, Хрватите, сме најдобри во навивањето и давањето поддршка. Тоа навистина е голема чест“, рече таа.

„Горда сум што светот го виде тоа“

Марина вели дека не жали за својата реакција која го обиколи светот.

„Ги видов пораките насекаде. Горда сум што камерманот го сними тоа и што целиот свет го виде. Горда сум што го забележаа тој момент кој нè прикажува нас како навивачи, нас како мала земја, но и како вистински познавачи на фудбалот. Тоа се емоции што не можат да се опишат“, изјави таа.

„Реакцијата на цела Хрватска“

Да потсетиме, бројни навивачи напишаа дека нејзината реакција е „реакцијата на цела Хрватска“.

Во моментот кога стана јасно дека голот нема да биде признаен, навивачката остана во шок, а токму тој момент стана еден од највпечатливите кадри на вечерта.

„Е*и се“ (F*ck you), извика таа, а снимката во меѓувреме се прошири на социјалните мрежи.

Голот што го подели светот

Дури и ако не следите фудбал, тешко дека можевте да ја избегнете приказната за натпреварот меѓу Хрватска и Португалија.

Освен балканските медиуми, за спорната ситуација пишуваат и бројни светски медиуми, а расправата сè уште не стивнува.

Да потсетиме, голот на Јошко Гвардиол за 2:2, кој на Хрватска ќе ѝ донесеше продолженија во осминафиналето на Светското првенство, не беше признат бидејќи, според објаснувањето на судиите и ФИФА, хрватскиот напаѓач Игор Матановиќ со косата ја допрел топката додека бил во офсајд.