Човекот што ја предвиде кризата во 2008 година повторно предупредува: Се обложува на пад на пазарот на вештачката интелигенција

Иако американските берзи деновиве соборуваат историски рекорди, Бери тврди дека тоа е привремено и дека нè очекува нагол пад на вредноста на акциите, сличен на големиот берзански крах од 1987 година, пишува „CNBC“.

„Верувам дека сме многу блиску до самиот врв и дека е можен драстичен пад. Сепак, сè додека берзата соборува рекорди, тоа ќе привлекува нови луѓе да вложуваат пари“, напиша Бери.

Главните двигатели на сегашниот раст на берзата се неочекувано добрите приходи на големите компании, падот на цените на нафтата и продолжувањето на големата еуфорија околу вложувањата во технолошкиот сектор.

Бери е еден од ретките на Волстрит кој отворено се сомнева во одржливоста на сегашниот бум на вештачката интелигенција (AI). Тој смета дека во AI инфраструктурата се вложуваат пари преку ризични финансиски конструкции, кои во еден момент мора да се распаднат.

Тој предупреди дека сегашниот мир на пазарот создава лажно чувство на сигурност. Кога цените на акциите постојано растат без големи осцилации, големите инвестициски куќи почнуваат масовно да позајмуваат пари и да преземаат сè поголеми ризици за да заработат уште повеќе, што целиот систем го прави исклучително ранлив на ненадеен шок.

И покрај тоа што цените на акциите и понатаму растат, Бери не се откажува од своите облози за нивен пад. Тој ги вложил своите пари сметајќи дека акциите на технолошките и индустриските гиганти, како „Nvidia“, „Tesla“, „Micron“, „Palantir“ и „Caterpillar“, наскоро ќе ја изгубат својата вредност.

Тој истакна дека и понатаму е сигурен во својата прогноза и дека сите овие облози досега му донеле профит, освен оној против „Nvidia“. Сепак, додава дека ќе ги повлече своите средства ако пазарот продолжи да се движи спротивно на неговите очекувања, пишува „CNBC“.