Бавах, одморалиштен остров во оддалечениот дел на Индонезија, има програма за заштита на морските желки. Тројца постојано вработени морски биолози патуваат низ архипелагот, собирајќи јајца од морски желки пред гуштерите да стигнат да ги изедат.

Јајцата повторно се закопуваат на една од плажите на одморалиштето, во заштитена куќичка, а потоа внимателно се следат за да се забележат знаците на изведување.

Морските желки можат да живеат со векови, но најпрво мора да го преживеат раниот период од животот. На Бавах, научниците направиле гнездо со само еден можен излез, а оттаму новоизведените желки се обидуваат да го пронајдат патот до морето. Излегуваат по своевидна „патека за куглање“ во песокот, со мали ѕидови направени за да ги задржат на вистинскиот пат.

Кога ќе почне да се спушта самракот, а биолозите ќе видат дека некои желки се извеле, вработените почнуваат да им испраќаат известувања на гостите на одморалиштето, повикувајќи ги навреме да пристигнат на плажата за да присуствуваат на таа глетка.

Набљудувањето, а секако и снимањето, на ова чудо е една од причините поради кои гостите од целиот свет издвојуваат десетици илјади долари.

Индонезија има околу 17.000 острови, расфрлани по морето како драгоцени камења на ѓердан. А ова одморалиште поседува шест острови, создавајќи свој мал приватен рај во еден дел од Јужното Кинеско Море.

Патувањето до резерватот Бавах, кој станува сè попознат по своите холистички искуства насочени кон здравјето и благосостојбата, обично започнува така што гостите од различни делови на светот пристигнуваат во блискиот Сингапур, каде што се пријавуваат во хотели.

Точно во 7 часот наутро влегуваат во црн автомобил и се упатуваат кон едно од траектните пристаништа во Сингапур, каде што минуваат пасошка контрола и го преминуваат Сингапурскиот мореуз до индонезискиот остров Батам.

Оттаму повторно ги презема луксузен автомобил и ги превезува до аеродромот Ханг Надим на Батам, каде што минуваат покрај мноштво патници на комерцијални летови и се качуваат во приватен хидроавион кој ги чека на пистата.

Во хидроавионот можат да се сместат само 10 патници. Постојат два такви авиони, еден син и еден зелен, и тие служат за превоз на луѓе и залихи до Бавах и назад. Количината на багаж, како човечкиот така и другиот, е строго ограничена. Секој гостин може да понесе 15 килограми багаж, а пред качувањето мора да помине кратка проверка на вкупната тежина на себе и на својот багаж.

За патниците кои го посетуваат Бавах на крајот од долго патување низ Југоисточна Азија постои можност да го остават багажот во складиште на траектната станица на Батам.

За да помогне во наметнатиот минимализам, одморалиштето исто така обезбедува бројни потреби – основни тоалетни производи како крема за сончање, шампон и стапчиња за уши, како и бањарки, шешири за сонце, крпи за плажа, па дури и кафтан.

Седумдесет и пет минути по полетувањето од Батам, авионот слетува на водата покрај тесниот дел од пристаништето, каде што го пречекуваат униформирани вработени кои во еден глас мавтаат и нудат студени крпи.

Островите Риау се наоѓаат во најсеверниот дел на Индонезија, поблиску до Сингапур и Малезија отколку до Џакарта. Додека Батам веројатно е најпознат меѓу овие острови поради лесниот пристап од Сингапур, низ целиот овој архипелаг се наоѓаат десетици ненаселени острови. На нив во голем број живеат дамчести гулаби, овошни лилјаци и гребенски ајкули со црн врв.

Пристигнувањето на овој мирен остров е прилично едноставен начин да заборавите дека ви биле потребни четири часа за да стигнете дотука. Приватни батлери ги придружуваат гостите до нивните апартмани. Рачно резбани дрвени плочи со имињата на гостите се наоѓаат на надворешните страни од нивните колиби.

Низ целиот остров постои Wi-Fi за посетителите кои едноставно не можат да поднесат да се откажат од социјалните мрежи, но хотелот исто така обезбедува основни телефони програмирани само за комуникација со консиержите.

Овој луксуз не е евтин. Најосновните соби на Бавах почнуваат од 1.980 долари, а поради напорното патување до островот и назад постои минимум престој од три ноќи.

По таа цена се вклучени основните содржини – три оброци и еден спа-третман дневно. Но гостите можат дополнително да го зголемат нивото на луксуз со организирање приватни вечери на плажа, кои чинат 1.000 долари, со нарачување алкохолни пијалаци или со продолжување на спа-третманот од 45 на 90 минути.

Наједноставното сместување е градинарски апартман со шатор, додека најскапиот е апартман со четири спални соби и сопствен инфинити базен, кој во текот на главната сезона чини 12.300 долари. За уште полуксузно искуство што се доживува еднаш во животот, Бавах има уште еден остров со сместување што може да се изнајми во целост, заедно со персоналот.

Пол Робинсон, директор на операциите на одморалиштето, за „CNN“ изјави дека Бавах е наменет за луѓе на кои „Малдивите им здодеале“. Според Робинсон, одморалиштата на Малдивите се одлични во обезбедувањето луксузни бунгалови над вода и можноста да уживате во тоа да не правите апсолутно ништо, но за одреден тип богати, но активни гости, Бавах верува во зголемување на бројот на активности што ги нуди.

Тој список вклучува дегустации на кафе и часови за правење парфеми, покрај очекуваните активности на вода, како што се нуркање со маска, пливање во дивината и нуркање со боца.

Хотелскиот спа-центар „Aura“ се наоѓа во зграда која потсетува на куќичка на дрво за возрасни, целосно изработена од дрво и отворен простор. Азиски, особено индонезиски состојки, каде што е можно, се наоѓаат насекаде: кафе и мед во пилинзите за тело; ѓумбир, кафирска лимета и галангал во масажите; зелен чај и кокосово масло во третманите за лице.

„Aura“ е повлечена од главната патека на островот. Посетителите минуваат низ дрвен тунел и на другиот крај излегуваат во спа-центарот, кој е направен од светло дрво.

Самата зграда е дел од искуството: иако влезниот простор има доволно место за одмор со шолја чај, ќе ви биде кажано да ги замените обувките со рачно изработени сандали, а потоа ќе ве поведат низ лавиринт од простории пред да стигнете до просторот за третмани. Многу од просториите се на катот, што создава чувство дека сте во дворна куќичка на дрво – многу елегантна.

Гостите имаат право на еден спа-третман дневно, кој е вклучен во цената на собата. Постои спа-мени, но за да го имате најдоброто искуство, испратете му порака на персоналот на спа-центарот однапред и опишете каде моментално се наоѓате на вашето патување кон здравјето и благосостојбата, а потоа препуштете им ним да дадат препораки.

Иако спа-третманите мора да се резервираат еден ден однапред, постојат неколку простории до кои гостите можат самостојно да пристапат: сува сауна, парна сауна и базен со студена вода.

Покрај „Aura“, секојдневно се одржуваат часови по јога во мал бунгалов над водата. Во тој бунгалов се наоѓа и мала теретана со справи за вежбање и тегови. Сепак, некои гости повеќе сакаат да вежбаат во удобноста и приватноста на своите соби, па вработените ја доставуваат опремата со помош на едно од бројните колички за голф што се користат низ островот.

Подготовка за патувањето

Сè на Бавах е внимателно уредено така што изгледа како воопшто да не е уредено. Ова не е место за чешми од чисто злато или прекривки покриени со логоа. Наместо тоа, тука има кади издлабени од локално индонезиско дрво и кревети обвиткани со нежни свилени облаци што висат под таванскиот вентилатор.

Една недела пред пријавувањето, од гостите се бара да достават список со своите желби, од навиките за спиење до алергиите на храна. Таа персонализација се појавува насекаде, целосно незабележливо.

Вработените ги паметат овие преференции, нудејќи бело вино („знам дека не сакате црвено“) или свежа овошна салата („без грејпфрут, бидејќи сте алергични“). Навечер, како подарок при средувањето на собата, се појавува прилагодена чоколадна плочка или слатко направено од омилените вкусови.

Локалните јадења со многу морски плодови се комбинираат со секојдневна домашна комбуха или сок. Капучино и продолжено кафе што ги подготвува бариста секогаш се достапни, но собите имаат и апарати кои можат да сомелат свежи зрна за гостите кои повеќе сакаат сами да си го подготват кафето.

Две вечери неделно, хотелскиот ресторан на плажата се претвора во своевиден индонезиски пазар на отворено, обезбедувајќи им на гостите вкус на културата што ја заобиколиле на патот до островот.

Мал бутик продава работи како костими за капење направени од рециклирана океанска пластика и топки сладолед – вкусовите за секој ден се објавуваат на табла испишана со креда.

Островската библиотека има здрава мешавина од информативни книги за индонезиската култура и локалниот растителен свет, заедно со вообичаените трилери и книги за читање купени на аеродром.

Сè помалку или повеќе потсетува на „The White Lotus“ – но без прикриениот страв дека ќе се случи нешто лошо.

„Босоногиот луксуз“ стана клише во туристичката индустрија, а Робинсон е еден од луѓето кои го мразат тој израз. Сепак, признава дека тој може да го опише типичниот гостин на Бавах, лице кое може да си го дозволи најдоброто од најдоброто, но верува дека крајниот луксуз е целосното оддалечување од сè.

На некој начин, одморалиштето е поголема верзија на безбедното гнездо направено за јајцата на морските желки – мирно е, гостите се разгалени и згрижени, а сè редовно се проверува. Сега останува само да се упатите кон морето – и да напредувате, пишува „CNN“.