Легендарниот актер од филмот „Мери Попинс“ на Инстаграм објави видео во кое виси наопаку на инверзивна маса, со хаштагот „само движи се“. На снимката, седокосиот и брадест Ван Дајк користи инверзивна маса за истегнување и растоварување на ’рбетот, додека во заднина се слуша песната „Keep Stretching“ на групата Муншпац.

Три тренинзи неделно

Ван Дајк веќе со години редовно вежба, а во теретана оди и до три пати неделно. Користи справи со тегови, прави кружни тренинзи и вежби за истегнување, а посебно внимание им посветува на вежбите за стомачните мускули за да ја одржи силата.

Иако неодамна при излегување со сопругата Арлин Силвер користел одалка, за време на тренинзите и понатаму е многу активен.

Прослава на 100-тиот роденден

Стотиот роденден го прослави во декември во својот дом во Малибу, опкружен со семејството и пријателите. Неговата сопруга по тој повод организирала „флеш моб“ со микс од песни од неговата кариера.

„Сè помина совршено – баш сè“, изјави тогаш Арлин за „Пипл“. „Беше пресреќен. Обожавам да го гледам толку среќен. Сè изгледаше совршено“, додаде таа.

Поранешната шминкерка (54) додала дека по прославата била среќна и благодарна и дека ѝ олеснало што сè поминало според планот.

Тајната на долговечноста

Ван Дајк дел од заслугите за својата долговечност ѝ ги припишува на одлуката во педесеттите години од животот да престане да пуши и да консумира алкохол. Говорејќи на хуманитарен настан одржан во неговиот дом, тој рекол дека веројатно е последната жива личност која имала можност да го запознае и да поминува време со Волт Дизни, кој во 1966 година почина од рак на белите дробови.

„Беше прекрасен човек. Само премногу пушеше“, рекол тој, пренесе „Пипл“. Кога неговиот син Бери забележал дека татко му никогаш не бил страстен пушач, актерот го поправил.

„Всушност, многу пушев. Мислам дека дури во педесеттите години сфатив дека сум склон кон претерување и зависности. Ако нешто ми се допаѓаше, претерував со тоа. Затоа се откажав од алкохолот, цигарите и сето тоа и веројатно затоа сè уште сум тука“, објаснил Ван Дајк.