Актерот (62) се појавил со проседена, малку неуредна коса и густа брада, а изгледот дополнително го надополнил со големи црни очила за сонце. Покрај него позирала неговата 31-годишна сопруга.

Кејџ носел темносин смокинг со суптилен кружен дезен и контрастни ревери, бела кошула со отворена јака, црни панталони и лакирани мокасини.

Рико се решила за комбинација во боја на слонова коска, која одлично се вклопила со темниот костум на нејзиниот сопруг. Носела кошула со висока јака, панталони со широки ногавици и долг мантил со проѕирни ракави. Правата црна коса со густи шишки ѝ паѓала преку рамениците, а комбинацијата ја заокружила со мала црна чанта и впечатлив маникир.

„Се свршивме преку ФејсТајм“

Кејџ претходно раскажал дека ја запознал Рико во Јапонија, а ги зближила љубовта кон животните. Во пресрет на премиерата на филмот „Pig“ во 2021 година, за „Ентертејнмент тунајт“ се присетил на нивната прва средба.

„Се запознавме во Јапонија и веднаш ми беше прекрасна. Имавме многу заеднички работи“, рекол тој. Во текот на разговорот дознал дека Рико има две летечки верверички, што, како што раскажал, го убедило дека тие двајца би можеле да бидат добар пар.

Нивната врска потоа продолжила на далечина, а Кејџ ја запросил додека не биле заедно. Во радио емисијата на неговиот брат Марк Копола, тој објаснил дека Рико се вратила во Јапонија, додека тој останал во Невада.

„Се свршивме преку ФејсТајм“ рекол тогаш, пренесе „Пипл“. Кејџ избрал прстен со црн дијамант за неа, бидејќи црната е нејзината омилена боја, а потоа ѝ го испратил во Јапонија.

Се венчале во Лас Вегас

Парот се венчал во хотелот „Wynn“ во Лас Вегас на 16 февруари 2021 година. Датумот на нивната венчавка бил избран во чест на роденденот на покојниот татко на Кејџ, Август Копола, а самата церемонија ги споила католичките и шинтоистичките елементи.

Во разговор за „Лос Анџелес Тајмс“ во 2022 година, Кејџ рекол дека е многу среќен во бракот.

„Навистина сум среќно оженет. Знам дека пет брака се многу, но мислам дека овојпат погодив“, рекол тој.

Својот поглед кон љубовта го опишал и во интервју за „GQ“ во април истата година.

„Јас сум романтичар и кога сум вљубен, сакам на таа личност да ѝ дадам сè што можам“, истакнал актерот.

Ова е петти брак за Кејџ

Пред Рико Шибата, Кејџ бил во брак уште четири пати. Неговиот прв брак бил со актерката Патриша Аркет, со која бил од 1995 до 2001 година.

Веќе следната година се оженил со Лиза Мари Присли, но нивниот брак завршил во 2004 година. Истата година Кејџ се венчал со Алис Ким. Нивниот брак траел 12 години, сè до разделбата во 2016 година.

Четвртиот брак го склучил со шминкерката Ерика Коике во март 2019 година. Тој брак траел само четири дена, по што Кејџ побарал негово поништување.