[ФОТО] Ловец на скапоцени камења во САД тврди дека пронашол дијамант вреден еден милион долари

Пиридин со години трагал по дијаманти, а на почетокот на оваа година, заедно со пријател, од чакал извадил камен за кој тврди дека колекционери му рекле дека би можел да вреди повеќе од еден милион долари.

Најмалку еден искусен проценител изјавил за „Асошиејтед прес“ дека дијамант со таква големина и квалитет би можел да вреди околу една четвртина од таа сума, што и понатаму претставува исклучително вредно откритие.

Моментот на откритието Пиридин го пренесувал во живо на ТикТок. Откако го испрал чакалот од кофата и го истурил на маса, ги забележал сјајните површини на дијамантот и извикал: „О, Боже! О, Боже!“ Потоа додал: „По ѓаволите, имаме голем!“.

Дијамантот е приближно со големина на нокт и е најголемиот пронајден оваа година во паркот „Кратер на дијамантите“. Од 1972 година, кога поранешниот отворен рудник за дијаманти станал дел од државниот парк, таму биле откриени повеќе од 37.000 дијаманти.

Влезот во паркот чини 15 долари, а посетителите можат да наполнат кофа од пет галони со камења и да ги задржат сите скапоцени камења што ќе ги пронајдат. Повеќето пронајдени дијаманти се мали и вредат само неколку стотици долари.

Најголемиот дијамант некогаш пронајден во Соединетите Американски Држави, вреден 40,23 карати наречен „Uncle Sam“ (Чичко Сем), бил откриен токму во овој парк во 1924 година.

Пиридин, кој потекнува од Мисури, од 2013 година ја пробува својата среќа во паркот, а дури и се преселил во блискиот Марфрисборо за да биде поблиску до своето хоби.

Најновиот и најголем пронајдок го нарекол „American Dream“ (Американски сон) а заработката планира да ја подели со Мајкл Шумахер од Висконсин, кој му помогнал да го ископа чакалот и да отвори сопствен рудник за кристали.