Одделот „BMW M“ го произведе својот милионити автомобил, а јубилејот беше одбележан со моделот „M3“ во специјална портокалова боја.

Истовремено, компанијата откри нови детали за идниот електричен „M3“.

„BMW M GmbH“ е основан во 1972 година, а сега од фабриката во Минхен излезе милионитиот автомобил со ознаката „M“.

Јубилејниот примерок е „M3“ во бојата „BMW Individual Fire Orange III“, кој му беше предаден на директорот на фабриката во Минхен, Петер Вебер.

Иако „BMW“ не ги откри сите детали, се чини дека станува збор за верзијата „M3 Competition“. Актуелниот „M3“ користи 3,0-литарски шестцилиндричен битурбо мотор, кој развива до 530 КС, додека верзијата со погон на сите четири тркала забрзува до 100 км/ч за 3,3 секунди.

Максималната брзина е ограничена на 250 км/ч.

Сепак, ерата на актуелниот „M3“ се ближи кон крајот. „BMW“ веќе ја претстави новата, осма генерација на Серија 3, додека фабриката во Минхен од 2027 година ќе произведува исклучиво електрични автомобили.

Во погонот се инвестираат околу 650 милиони евра, а производството на електричниот „i3“ започна во август.

Електричен „M3“ со четири мотори

По повод јубилејот, „BMW M“ објави и нови фотографии од камуфлираниот прототип на електричниот „M3“.

Автомобилот е заснован на концептот претставен во јуни, но дизајнот е приспособен за сериско производство.

Во споредба со концептот, прототипот има „поскромен“ преден браник, помал сплитер, класични ретровизори и поконвенционален заден дел.

Задржани се карактеристичните детали, како жолтите графички елементи во фаровите, четвртастите долни светлосни единици, капакот на моторот со отвори за вентилација и малиот заден спојлер.

„BMW“ сè уште не ги објави техничките податоци, но се очекува погон со четири електромотори. Се шпекулира за моќност од околу 700 до дури 1.000 КС, што би го вброило новиот „M3 EV“ меѓу најмоќните електрични спортски лимузини.

„BMW“ ја подготвува електричната верзија на „M3“ за производство токму во Минхен, со што овој модел ќе стане дел од новата генерација автомобили „M“ со електричен погон.