На промената го поттикнал непријатен момент за време на концерт, кога сфатил дека телесната тежина му го отежнува движењето, пренесе „Us Weekly“.

За време на концертот едвај станал

Калид се потсетил на настапот во октомври 2025 година, кога за време на еден дел од концертот клекнал за да ѝ се заблагодари на публиката. Но, кога се обидел да стане, сфатил дека тоа му претставува проблем.

„Има дел од настапот во кој клечам за да изразам благодарност. Се сеќавам дека клекнав, но не можев нормално да станам“, раскажал тој.

По концертот му се јавиле пријатели загрижени поради неговото дишење.

„Еден пријател ми рече дека тешко сум дишел. Десет минути подоцна некој друг ми го кажа истото. Тогаш сфатив дека мора посериозно да се погрижам за своето здравје“, објаснил тој.

Во тој период тежел меѓу 134 и 136 килограми.

„Вежбав и се трудев да се хранам подобро, но ми требаше помош“

Музичарот објаснил дека веќе се обидувал да ослабе со промена на исхраната и редовна физичка активност, но не бил задоволен од резултатите. Затоа се обратил кај лекар и почнал да зема „вегови“, лек што содржи семаглутид и припаѓа на групата лекови познати како агонисти на ГЛП-1 рецепторите.

„Имав мотивација, вежбав и се трудев да се хранам поздраво, но ми требаше помош“, признал раперот.

Тој го користи лекот приближно една година, а за тоа време, според сопствените зборови, изгубил околу 34 килограми. Вкупно ослабел приближно 40 килограми, а сега тежи меѓу 91 и 96 килограми.

Голфот и секојдневното одење станале дел од неговата рутина

Покрај лекот, Калид ги променил и секојдневните навики. Особено го засакал голфот, па наместо да се вози со електрично возило, теренот сега го поминува пеш.

„Се заљубив во голфот. Толку многу ја сакам таа игра“, изјавил тој, додавајќи дека секојдневно прави повеќе од 10.000 чекори.

Тврди дека денес има значително повеќе енергија и мотивација.

„Се чувствувам многу поздраво. Имам повеќе енергија и повеќе волја за сè“, раскажал тој.

Неговата цел е да достигне околу 91 килограм, но нагласил дека најважно му е да го зачува здравјето.

Синовите му се најголема мотивација

Калид истакнал дека негова најголема мотивација се неговите двајца синови, Асахд и Аалам, кои ги има со сопругата Никол Так.

„Живееме за нашите деца, а тие ни даваат причина за живот. Затоа мора да го направам својот дел“, истакнал тој.

Одлучил јавно да проговори за користењето на лекот бидејќи смета дека неговото искуство може да им помогне на другите кои се соочуваат со слични проблеми.

Неговата приказна е воедно дел од соработката со фармацевтската компанија „Ново Нордиск“, производителот на „вегови“. Компанијата потврди дека Калид учествува во промотивна кампања во која зборува за исхраната, движењето и лекувањето на дебелината.

„Вегови“ е лек што се издава на рецепт и не е погоден за секого. За неговата примена одлучува лекар, а искуството на Калид не значи дека сите корисници ќе постигнат исти резултати.