Кондомите се тестирани според ригорозни стандарди и се исклучително сигурни. Меѓутоа, доколку не ги чувате правилно, може да се оштетат, што може да доведе до несакана бременост или пренесување на полова инфекција. Дури и оштетувањето кое не е видливо со голо око може да ги направи кондомите неефикасни.

Имаат рок на траење

Многумина не знаат дека презервативите имаат рок на траење, затоа проверете го датумот на пакувањето. Ако пакувањето е малку оштетено или искинато, подобро фрлете го кондомот. Ако пакувањето не е целосно затворено, кондомот може да се исуши и да стане склон кон пукање.

Постојат многу работи кои можат да го направат кондомот неефикасен, вклучувајќи не само остри предмети, туку и температура, сончева светлина, итн. Кондомите треба да се чуваат подалеку од екстремна топлина или студ, така што најдобро е да се чуваат на собна температура.

Исто така, треба да ги чувате некаде каде што нема да бидат поместувани, компресирани или свиткани. За повеќето луѓе, спалната соба е најдоброто место за чување кондоми.

Меѓутоа, ако имате деца, чувањето кондоми во фиока која е на нивен дофат не е добра идеја, бидејќи тие лесно можат да ги најдат и да ги оштетат. Во тој случај најдобро е да ги ставите на место кое е вон дофат на децата.

Паричниците исто така не се најсоодветно место за чување на презервативи, бидејќи често се ставаат и вадат од џебовите, се отвораат и затвораат, се превиткуваат итн. Сето ова може да го оштети кондомот, така што чувањето кондом во вашиот паричник не е најдобрата опција.