Лекарите предупредуваат: Овие пет знаци укажуваат на мозочен удар и до 3 месеци претходно

Затоа, според советите на лекарите, треба да обрнете внимание на 5 предупредувачки знаци кои можат да се појават и до 90 дена пред мозочниот удар.

На пример, ако вашата рака наеднаш се вкочани или ја чувствувате слаба или ако говорот ви стане нејасен, а симптомите брзо се повлекуваат, не треба да заборавите на тоа, туку да го контактирате вашиот лекар.

Тие минливи симптоми слични на мозочен удар, иако не оставаат долгорочни последици, не треба да се игнорираат, пишува „The Sun“.

Овие знаци може да укажуваат на транзиторен исхемичен напад (TIA), познат и како „мини-мозочен удар“ или „предупредувачки мозочен удар“.

„Симптомите на TIA вклучуваат спуштено лице, слабост во рацете и отежнат говор, слично на вистински мозочен удар, но без трајно оштетување“, вели д-р Ахмед Итрат од „Cleveland Clinic Akron General“.

Колку е сериозна работата, дополнително објасни директорот за васкуларна неврологија во болницата „Langon“ во Њујорк.

„Тоа е навистина предзнак за многу луѓе дека ќе доживеат мозочен удар дури и во следните 48 часа, а секако и во следните 7, 30 или 90 дена“, изјави д-р Џиљо за „Huffington Post“.

Според Националната здравствена служба на Велика Британија (NHS), до „мини-мозочен удар“ може да дојде кога протокот на крв во мозокот е привремено прекинат. Симптоми на кои треба да внимавате се:

- Рамнотежа - лицето може да се занесе или целосно да ја изгуби рамнотежата.

- Вид - промените во видот како што се заматување, губење на видот или двојно гледање се нешто на што треба да се внимава.

- Лице - можеби е спуштено на едната страна, лицето не може да се насмее или устата или очите малку му се „искривени“.

- Раце - лицето можеби нема да може да ги крене двете раце и да ги држи во таа положба поради слабост или вкочанетост на едната рака.

- Говор - говорот може да биде нејасен, односно лицето воопшто да не може да зборува, иако остава впечаток дека е свесно за сè. Тоа исто така може да има проблеми да разбере што му се зборува.

Во секој случај, лекарите предупредуваат дека доколку забележите некој од овие знаци, веднаш треба да повикате Итна помош. Тие исто така истакнуваат дека некои од овие симптоми може да траат околу 10 минути и да исчезнат во рок од 24 часа.