Сите што се грижат дека во Италија повеќе нема градови што продаваат куќи за едно евро, може да здивнат.
Градчето Пене, кое се наоѓа во централниот италијански регион Абруцо, на половина пат помеѓу Јадранското крајбрежје и планинскиот масив Гран Сасо, продава напуштени куќи по цена на едно еспресо во обид да ја спречи депопулацијата, пишува Си-ен-ен.
Широката употреба на тули во сите историски згради и калдрмените улици му го дале на Пене прекарот „Citta del mattone“, односно „Град на тулите“. Во 2006 година, Пене ја добил сребрената медалја за граѓански заслуги за време на Втората светска војна.
Еден дел од објектите во Пене веќе е продаден, но наскоро ќе биде ослободена уште една серија недвижности.
Не е потребна гаранција во вид на депозит како аванс за да се обезбеди руиниран стан. Сè што е потребно е посветеност од купувачите да ја реновираат „купената“ недвижност.
Од почетокот на програмата во 2022 година се продадени шест куќи, главно на Италијанци. Според градоначалникот, следната серија од „неколку“ имоти наскоро ќе биде пуштена во продажба – „во наредните неколку недели“ – и изгледа дека ќе следуваат уште.
„Потенцијално има повеќе од 40 празни згради во градот што бараат нови сопственици, а сите се наоѓаат во историскиот центар, кој останал ненаселен откако семејствата почнале да се иселуваат пред неколку децении“, изјави за Си-ен-ен градоначалникот на Пене, Гилберто Петручи.
„Иако нашето вкупно население изнесува околу 1.200 жители, останаа само 1.000 луѓе кои живеат во нашиот прекрасен стар кварт, кој ризикува да стане град на духови.“
Роден и израснат во Пене, Петручи почувствувал дека мора да направи нешто за да му даде нов живот на древното срце на својот роден град пред да биде предоцна: „Многу ме боли кога гледам овие куќи напуштени“.
Првите три куќи за едно евро беа продадени во 2022 година. Втората серија од три куќи беше продадена кон крајот на минатата година.
Најновата серија се состои од истиот тип куќи како и претходно продадените – главно стари, некои потекнуваат од средниот век со понатамошни подобрувања направени во ренесансата, вели Петручи. Два од неодамна продадените објекти се изградени на почетокот на 20 век. Тие имаат до три ката, со површина од околу 70-120 квадратни метри.
Според Петручи, повеќето од овие стари домови некогаш им припаѓале на локални семејства кои заминале во потрага по подобар живот на друго место – особено по Втората светска војна, кога голем дел од архитектонското наследство на градот било уништено во бомбардирањата.
Бранови на емиграција продолжиле и во 70-тите години, кога многу семејства масовно се преселиле во САД, Белгија, Венецуела и во блиските поголеми градови за да работат во фабрики.
Историскиот центар на Пене е сместен на панорамска локација што се протега на две ридови и е составен од лавиринт на камени порти, богато украсени монументални фонтани и живописни улици.
За разлика од повеќето други градови, Пене има пофлексибилни правила за купувачите, вели Петручи.
„Единствениот услов е купувачите да се обврзат дека ќе ги реновираат овие куќи во рок од три години, но не бараме депозит како гаранција за почеток на работите. Навистина сакаме да ги охрабриме и поддржиме оние што доаѓаат да го оживеат овој древен крај“, додава градоначалникот.
Повеќето програми за куќи од едно евро бараат купувачите да платат депозит од 2.000 до 5.000 евра, кој им се враќа доколку и кога ќе ги завршат реновирањата.
Дополнителна предност на програмата на Пене е агенцијата што им помага на купувачите во текот на процесот на реставрација.
„Имаме тим архитекти и експерти кои можат да советуваат и да ги поддржат работите за реновирање, да помогнат во наоѓањето градежници и геодети, да им прикажат на купувачите преку тродимензионални анимации како ќе изгледа нивниот дом по преуредувањето и да даваат совети во различните фази на реновирањето“, вели Петручи.
Според градоначалникот, основниот трошок за реновирање на мала или средна куќа изнесува околу 20.000 евра. Ако има повеќе заинтересирани за една иста куќа, таа ќе биде продадена на оној со најдобриот – и најбрзиот – план за реновирање.
Ако пак не сте расположени сами да спроведете реновирање, на пазарот има многу куќи подготвени за вселување, како и такви што бараат минимално средување. Почетната цена за веднаш вселивите куќи изнесува околу 40.000 евра.
Петручи го дефинира стариот кварт на својот роден град како „музеј на отворено“, каде што архитектурата е мешавина од средновековни, готски и ренесансни стилови.
„Имаме славно минато. Пене има милениумски корени што оставиле траги во неговиот пејзаж. Првите докази за праисториски населби датираат од времето на Осците, италски народ што живеел на висорамнини за да се заштити од непријатели“, нагласува тој.
Во римско време, Пене бил познат како Пина и бил важна точка во комуникациските и трговските мрежи, за што сведочат римските скулптури, накитот и камените столици што сè уште се изложени во локалниот музеј.
Во градот секоја година се одржува живописната трка на коњи Палио, што потсетува на познатиот настан во Сиена, Тоскана.
Во околината на Пене се одгледуваат различни житарици, вклучувајќи спелта, пченка, јачмен и прочуената дурум пченица за производство на тестенини. Гурманите го обожаваат локалното екстра девствено маслиново масло и вината како розето Черасуоло и белото Требијано д’Абруцо.
Традиционалните јадења вклучуваат пита тимбало (налик на лазања), макарони ала китара (рачно правени тестенини во облик на гитарски жици) и вкусни аростичини – ражничи од овнешко месо.
Италија е центар на програмите за продажба на евтини недвижности, главно на југот на земјата. Сицилија и Сардинија се меѓу најпопуларните дестинации за вакви зделки.
