Британскиот производител на луксузни спортски автомобили "Aston Martin" ги привршува финалните тестирања на новиот модел "Valhalla", кој располага со 1.065 коњски сили.
Исто така, "Aston Martin" најави дека ќе произведе само 999 примероци од овој автомобил, а производството ќе започне во вториот квартал од оваа година.
Тестирањата се одвиваат на патиштата во Обединетото Кралство и Шпанија, според официјалното соопштение на производителот, кое го пренесува порталот "motor1. com".
Со автомобилот управуваше професионалниот возач на "Aston Martin" и трикратен победник на трката „24 часа Ле Ман“, Дарен Тарнер. За време на тестовите, експертите работеа на финалните приспособувања на управувањето, активната аеродинамика и другите системи.
Новиот "Valhalla" припаѓа на категоријата "plug-in хибриди" и е придвижуван од 4,0-литарски V8 мотор со два турбо-полначи и 8-степен менувач со двојна спојка (DCT), кој воедно интегрира и електричен мотор.
Максималната брзина на овој суперавтомобил е ограничена на 350 километри на час, а забрзувањето од 0 до 100 км/ч трае само 2,5 секунди.
