"Apple" станува песимистичен во врска со претстојниот "iPhone 17 Air" – проценуваат дека дури 90% од корисниците нема да го купат овој телефон

Иако "iPhone 17 Air" ќе биде најтенкиот модел во новата понуда на "Apple" и сигурно ќе го привлече вниманието на љубителите на елегантен дизајн, се чини дека дури и самата компанија смета дека овој уред не е наменет за поголемиот дел од корисниците. Според најновите извештаи од интерни тестирања, само 60-70% од корисниците би можеле да издржат цел ден без полнење. Со други зборови, 30-40% од корисниците би требало веднаш да го избегнат уредот, а "Apple" проценува дека дури 90% од целата корисничка база не е вистинската публика за овој модел.

Решението кое "Apple" наводно го подготвува делува контрадикторно – специјална маска со вградена батерија. Но тоа целосно ја поништува основната причина за купување на овој модел – неговиот ултратенок профил.

Покрај батеријата со пократко траење, "iPhone 17 Air" ќе се соочи и со други ограничувања. Се очекува да користи основна верзија на процесор, без дополнителните можности што ги нудат "Pro" моделите, како и поедноставен систем на камери – најверојатно само еден сензор, без дополнителни леќи.

Поради сите овие фактори, "Apple" и индустриските извори наведуваат дека производството на овој модел ќе биде ограничено на само 10% од производните капацитети. Најголем дел ќе биде наменет за производството на "iPhone 17 Pro Max" (40%) и "iPhone 17 Pro" (25%), додека остатокот ќе оди на стандардниот "iPhone 17".

Иако "iPhone 17 Air" сигурно ќе има свој визуелен шарм и публика која го цени дизајнот, поголемиот дел од корисниците, со право, ќе се одлучат за потрадиционалните и помоќни "iPhone" модели, пренесува "9to5Mac".