Песната „За милион години“ е напишана пред точно 40 години, но во последните месеци доживеа нов живот како една од химните на студентските протести низ Србија.
Песната ја изведе Ју рок мисија, а тоа беше состав од најпопуларните изведувачи на поранешна СФРЈ, со што му упатија поддршка на Боб Гелдоф, кој се бореше да им помогне на гладните во Африка, а чија акција кулминираше со концертот „Live Aid“ на 13 јули 1985 година.
И навистина, во студиото се собраа речиси сите што во тој момент значеа нешто на домашната поп и рок сцена. Дури и оние што не можеа да се појават за време на снимањето на песната, беа таму за снимањето на видеото (Бора Ѓорѓевиќ и Горан Бреговиќ), пишува citymagazine.danas.rs.
Во прилогот на РТС од тоа време, можете да најдете интересни снимки од пробите и снимањето на таа песна, како и разни насмеани лица на познати пејачи.
Меѓутоа, во прилогот не можеме да ја видиме онаа „посмешната“ страна на сè и анегдотата што ја дознавме во филмот „Праслован“, документарец за животот и кариерата на Зоран Предин.
Зоран Предин бил на снимањето на песната, што дури можеше да се види и во извештајот на РТС, како и во спотот, но не бевме запознаени со целата приказна, а тоа е дека словенечкиот музичар пристигнал неколку часа порано пред снимањето и морал да го „убие“ времето во блиската кафеана. Друштво му правел Влада Дивљан од „Идоли“ и кога екипата дошла по нив за да ги одвезе на снимањето, сфатиле дека двајцата музичари се речиси „неупотребливи“ и под дејство на алкохол.
Сепак, тие отишле на снимањето, се прегрнале и пееле, но не биле од голема помош. Постои приказна од документарецот дека дури и Здравко Чолиќ се пожалил на нив затоа што не можел да пее поради нивното „дрдорење и завивање“.
Во видеото, зачувани се неколку секунди од снимката на нив двајца кои го потврдуваат тоа. Во еден кадар, дури и целиот Предин е исечен, а се гледа само неговата рака.
На крајот, неколку недели подоцна, кога се снимал посвечениот дел од спотот, Предин и Дивљан ги разделиле, секој на другата страна на студиото.
На крајот од кампањата, југословенските музичари ја изведоа „За милион години“ на осумчасовниот концерт на 15 јуни 1985 година во Белград. Спотот за песната беше прикажан на многу телевизиски станици низ целиот свет, а на 13 јули 1985 година беше прикажан како дел од концертот „Live Aid“ во Лондон, на голем видео екран.
