Иако прикажаниот автомобил сè уште е во концептна верзија, неговиот префинет дизајн и бројни детали се толку блиску до сериското издание, што веќе сега може јасно да се насети што нè очекува.

Надворешност: Агресивни и елегантни линии

Новата "Honda Prelude" се одликува со остри, динамични линии.

Предниот дел веднаш го привлекува вниманието со тенките LED светла со препознатлив светлосен потпис и долната маска што му дава благо „насмеан“ изглед.

Косата линија на покривот ја истакнува класичната купе-силуета, иако тоа е на сметка на просторот за задните седишта.

Задниот дел доминира со светлосна лента низ целата ширина на возилото и дискретен интегриран спојлер.

Внатрешност: Препознатлива, но со стил

На прв поглед, ентериерот потсетува на актуелната "Honda Civic", но нуди доволно уникатни елементи за да се издвојува.

Дигиталната инструмент табла и елегантната контролна табла потсетуваат на премиум моделите како "Acura Integra".

Во кабината доминираат материјали пријатни на допир што оставаат луксузен впечаток, а седиштата се украсени со релјефно лого "Prelude" и контрастни шевови.

Во центарот се наоѓа 9-инчен екран осетлив на допир. На централната конзола има доволно простор за складирање ситници, а класичната рачка за менување брзини е заменета со минималистички модерни контроли.

Како и претходно, новата "Prelude" ја задржува конфигурацијата 2+2, што значи дека задните седишта се многу ограничени и практични главно за деца.

Хибриден погон и возачко уживање

Потврдено е дека новата "Honda Prelude" ќе биде опремена со напредниот хибриден систем e: HEV од "Honda". Поради тоа, во кабината има само две педали – мануелен менувач не е во план.

Иако техничките спецификации сè уште не се официјални, прелиминарните податоци се следни:

• Мотор: 2.0-литарски четирицилиндричен бензинец со хибриден систем

• Моќност: 204 КС (непотврдено)

• Вртежен момент: 315 Nm (непотврдено)

• Погон: Преден

• Менувач: CVT (непотврдено)

Новата "Prelude" комбинира носталгичен дух со современа технологија и го најавува враќањето на спортските купе-модели во европската понуда на "Honda".

Се очекува сериската верзија да биде претставена наскоро …