Далмација гордо се претставува на светската архитектонска сцена благодарение на проектот за иновативна подземна вила, која неодамна влезе во финалето на „World Architecture Festival“. Проектот за вилата, која ќе биде изградена на Хвар во наредните години, не само што импресионира со својата естетика, туку и со концептот што е во склад со природната околина.
„Објектот сè уште не е во изградба, постои само како проект со намера да се изгради во следните неколку години“, изјавија за „Euronews Srbija“ од студиото „Proarh“.
Подземната вила е замислена да биде повеќе од обичен станбен објект – таа е пример за тоа како архитектурата може да биде во хармонија со природата. Архитектите од загрепското студио се потрудиле да ги искористат природните ресурси и да го минимизираат еколошкиот отпечаток. Вилата е дизајнирана така што се спојува со пејзажот, со што се постигнува хармонична интеграција со околната средина.
Земјиштето и проектот се во приватна сопственост.
Учествувајќи на „World Architecture Festival“, проектот за вилата доби можност да се претстави пред пошироката јавност и експертите од областа на архитектурата. Финалниот избор носи не само престиж, туку и можност да ги инспирира другите архитекти да размислуваат иновативно и еколошки.
Хварската вила ја симболизира иднината на архитектурата што не се плаши да ги истражува границите и да го редефинира начинот на кој размислуваме за станбениот простор.
Вилата влезе во финалето на „World Architecture Festival“ („WAF“), кој се одржува секоја година и претставува значаен настан што ги собира архитектите, дизајнерите и инвеститорите од целиот свет, пренесува порталот „InDesign“. Оваа година, „WAF“ ќе се одржи во Мајами од 12 до 14 ноември во Конгресниот центар „Miami Beach“, каде финалистите ќе ги презентираат своите проекти во живо пред жирито и публиката.
