Противпожарната единица „Calaveras Consolidated Fire“ се обидува да ги открие околностите на несреќата, која на прв поглед изгледала фатално за возачот. Наместо тоа, на местото на настанот не бил затекнат никој. „Пожарникарите реагираа на повик за возило кое удрило во дрво и излетало од патот на "Lake Camanche Parkway" во Бурсон“, објавија на „Facebook“. „Возачот побегнал од местото на несреќата, а ние не можеме да разбереме како некој можел да замине жив од оваа несреќа! "CHP" спроведува истрага.“

Фотографиите од Бурсон, место на околу 90 минути возење од Сакраменто, прикажуваат остатоци од „Honda Civic“ од шестата генерација. Автомобилот, од силата на ударот, бил распарчен на два дела, а покривот целосно искинат. Доколку не биле препознатливите детали како контролите за клима-уредот и задното странично стакло, би било невозможно да се идентификува моделот.

Преправки и отсуство на воздушно перниче

Фотографиите откриваат дека автомобилот имал неколку модификации пред несреќата. Во моторниот простор се забележува спортски филтер за воздух, а во внатрешноста – неоригинален трикрак управувач, кој изгледа како да е изваден од некој ван од 1970-тите.

Токму тој управувач значел дека возачот не располагал со воздушно перниче, иако оној на совозачката страна се активирал. Ова дополнително ја зголемило збунетоста на пожарникарите, кои на возачкото седиште со навлака со логото на „Honda“ не пронашле никого.

Корисниците на „Facebook“ веднаш почнале да шпекулираат што се случило. Некои сметаат дека автомобилот изгледа како да бил оставен таму пред подолго време, додека други сугерираат дека телото на возачот можеби го одвлекле диви животни. Една жена тврди дека видела маж како заминува од местото на несреќата. Сепак, полицијата досега не успеала да го пронајде возачот – ниту во околината, ниту во локалните болници.