Косопственикот на ресторанот, Џозеф Роулин, се здружил со Доран Биндер, еден од само петте британски сомелиери специјализирани за вода, за да ја смислат оваа несекојдневна понуда. „La Popote“ е ресторан со француска висока кујна.

„Сакаме да дадеме поразлична понуда“

Роулин ги објаснил мотивите за оваа одлука.

„Само сакавме да понудиме нешто поразлично, а Доран е луд за вода... Водата не е само вода“, изјавил тој додавајќи дека потегот е поттикнат од зголемениот интерес на гостите.

„Да имаше било какви негативности околу тоа, немаше ни да го направиме. Постои широк распон на цените така што луѓето можат да пробаат нешто поразлично“.

Седум врвни води

Гостите можат да бираат меѓу седум врвни води набавени ширум Европа, четири негазирани и три газирани.

Цените се движат од 5 фунти (5,78 евра) за изворската вода „Crag Spring Water“, па до 19 фунти за шише португалска газирана вода „The Palace of Vidago“.

Поделени реакции

Новата понуда предизвикала бројни коментари на социјалните мрежи, а мислењата се поделени. Некои изразиле неверување и критика:

„Кој идиот ќе плати 19 фунти за шише вода? Смејте се и реагирајте, но ќе има неколку хипстери кои се доволно глупави да го купат тоа. Манипулација со безумни богаташи? Секако изгледа како да е така“, напишал некој човек.

Од друга страна имало и такви кои ја поздравиле оваа идеја:

„Како лице кое не пие, прилично заморно е кога јадете надвор да ви се нуди мени со алкохол“.