Ова е прилика што не се пропушта – на аукција ќе се најде навистина посебен „Mercedes“. Не дозволувајте да ве залаже фактот дека станува збор за моделот 190, попознат како „baby-Benz“. Можеби не бил најсовршениот автомобил во својата класа, но токму тој го отвори патот за создавање на една од најдобрите спортски лимузини на сите времиња. А најголемиот адут е што зад воланот на овој примерок седел никој друг освен Аиртон Сена.

На претстојната аукција на куќата „RM Sotheby’s“ во ноември, во Лондон, главна ѕвезда ќе биде „Mercedes-Benz 190 E 2.3-16“. Проценетата вредност на автомобилот се движи меѓу 255.000 и дури 290.000 евра.

Сена и победата што промени сè

Ова не е обичен примерок – тоа бил личниот автомобил на Аиртон Сена, купен во 1985 година, непосредно по неговата голема победа на „Nürburgring“ на трката „Race of Champions“. Токму таа победа го означи почетокот на неговата легендарна кариера.

На 12 мај 1984 година, младиот Сена, тогаш дебитант во Формула 1 со тимот „Toleman“, добил покана од „Mercedes“ да настапи на трка по повод отворањето на новата GP патека на „Nürburgring“. На стартот биле 20 возачи, меѓу нив Ники Лауда, Ален Прост и Карлос Реутеман. Сите возеле идентични „Mercedes“-и во тркачка конфигурација.

Во дождливи услови, Сена го шокирал светот. Тргнал од третата позиција, а на крајот ги совладал Лауда и Прост, возејќи го својот „Smoke Silver Metallic“ болид прв низ целта. Тоа била победа што го натерала да реши дека мора да има сопствен 190.

Автомобил со посебна приказна

Сена го нарачал својот примерок директно од фабриката во 1985 година. Го презел во Штутгарт, во друштво на сонародникот Маурисио Гугелмин, и го одвезол до својата резиденција во Ешер, Англија. Автомобилот, во боја „Smoke Silver Metallic“ со внатрешност од црна кожа, доаѓа со целосна оригинална документација: фабричка фактура, сообраќајни дозволи и даночни потврди на негово име.

Го возел две години, натрупувајќи нешто помалку од 45.000 километри, пред да го продаде во 1987 година, кога се преселил во Монако и преминал во „McLaren“. Низ годините автомобилот неколку пати го менувал сопственикот, а актуелниот сопственик го купил во 1996 година и во 2004 го преселил во Австралија.

Денес автомобилот има нешто помалку од 250.000 километри и чува посебни детали како потписот на Ники Лауда во моторниот простор, додаден за време на ГН на Австралија во 2016 година. Со него доаѓаат и оригиналниот алат, радио „Becker Mexico“, фабрички противпожарен апарат и дури никогаш отворена кутија за прва помош.

За обожавателите на Аиртон Сена, ова е многу повеќе од автомобил – тоа е автентично парче историја.

"Cosworth" и "Evolution" – врвот на приказната

Да потсетиме, 190E 2.3-16 беше претставен во 1983 година и беше базиран на моделот W201 на „Mercedes“. Развиен во соработка со „Cosworth“, го придвижуваше 2.3-литарски четирицилиндарски мотор со 16 вентили и моќност од 185 КС. Автомобилот доаѓаше со петстепен „Getrag“ менувач со „dogleg“ распоред, спортски потпирач, диференцијал со ограничено пролизгување и аеродинамички пакет со спојлери и проширувања.

Забрзувањето до 100 km/h изнесуваше околу 7,5 секунди, а максималната брзина достигнуваше 230 km/h – што го правеше најбрзата лимузина на „Mercedes“ во тоа време.

Приказната доби завршница во 1990-тите преку изведбите „Evolution I“ и „Evolution II“, кои на „Mercedes“ му донесоа слава и на патиштата и во „DTM“ шампионатот.